Shillong, Naitung 1: Ka long ka sngi kaban sah jingkynmaw iaka jylla Meghalaya ha kaba baroh 3 tylli ki Unit jongka Ganol Hydro Powerplant kila sdang ban treikam bad la pyniaid ryntih lang bad ka National Grid.
Kane kadei ka sienjam kaba khraw ia ka jingiaid lynti jong ka jylla na ka bynta ban pahuh pahai ka bording elektrik haba ki kor ki bor pynmih iaka bording elektrik kin lah ban pynmih iaka bording haduh 65 MU man la u snem.
U Myntri Rangbah ka jylla lyngba ka Twitter ka jongu ula pynbna, “Nga dap da ka jingkmen ba baroh 3 tylli ki Unit jongka Ganol Hydro Power Plant mynta kila iaid ryntih lang bad ka Grid, da kaba kyntiew iaka jingpynmih ia ka bording elektrik man la u snem kaban long ruh ka jingiaid lynti ban poi sha ka jingpahuh pahai ka bording. Nga ai khublei ia baroh kiba la pynurlong ia kane”.
Haba ki projek pynmih bording kila iaid ryntih lang bad ka grid, ka mut ba kila treikam bad kila lah ruh ban pynmih iaka bording bad kane ka jingiaid ryntih ka pyni ba baroh ki Unit kila lah ban pynmih ia ka bording elektrik katkum ka jingdonkam jong ka Grid.
Kum ban shu kdew ha ka 4 tarik u Kyllalyngkot 2023 u Myntri Rangbah ka jylla u Conrad K. Sangma ula plie pyrda iaka Unit kaba nyngkong jongka Ganol Hydro Power Project kaban pynmih iaka bording kaba kot 7.5 MW.
Ka Ganol Hydro Power Project ha West Garo Hills kan lah ban pynmih iaka bording haduh 22.5 MW haba baroh 3 tylli kila sdang ban treikam.
Katei ka projek pynmih bording kala kot sha ka T. 560 Klur bad la sdang ia kane ka projek ha u snem 2014 bad kala jan poi ha u pud ban khang khyrdep noh namar ka jingkyrduh pisa, hynrei haba ka sorkar MDA hapoh ka jingialam u Conrad Sangma kala wan haka bor ha u snem 2018 kala pynthikna ba ka pisa kan poi naka bynta ban pyniaid shakhmat ia kane ka projek bad la lah ban pynkhie im biang ia kane ka projek.
Kane ka projek pynmih bording ka long kaba kongsan bha na ka bynta ban pyndap pynbiang iaka bording elektrik na ka bynta ki paidbah ka rilum Garo bad khamtam haba ka jylla ka mad iaka jingkyrduh jong ka bording elektrik.
Ka jylla ia mynta kala lah ban pynmih tang 380 MW ka bording bad ka jylla kala mad iaka jingpynlip iaka bording elektrik haduh 8-10 kynta mynta la 2 bnai tam namar ka jingduna palat ha kaban pynmih iaka bording elektrik namar ka jingduna u slap.
Pule ruh: Jaw ummat ka Congress katba ka Manipur ka dang jam sha ka jinglong jingman ba jai jai : Himanta
