Dibrugarh, Naitung 01 : U Myntri Rangbah ka Assam, Himanta Biswa Sarma hynne ka sngi Saitjain ula ong ba ka Congress kala iam bad jaw ummat namar ba ka Manipur kala sdang ban jam biang suki pa suki sha ka jinglong jingman ba jai jai kumba ju long baroh shikatta.
Haba iakren bad ki nongthoh khubor ha Dibrugarh, u Myntri Rangbah ka Assam uba dei ruh u Chief Convener ka NEDA ula ong “Mynta ka Congress kala iam ha ka por ba ka Manipur ka dang sdang jam sha ka jinglong jingman ba jai jai. Ka jinglong jingman ha Manipur kala nang kham biang n aka sngi sha ka sngi bad hapoh 10 sngi, kin dang don shibun ki jing kylla ki ban sa iohi bad baroh kin sa biang lut noh”.
U Himanta ula kynthoh ia kane hadien shisngi ka jingleit iuhkjat ba arsngi jong u Nongialam ka Congress Rahul Gandhi ha Manipur bad iakynduh ia ki lanot kiba kylla phetwir na ka thma iapher jaidbynriew ha kane ka Jylla ka thain Shatei Lam Mihngi ka Ri, kaba la sdang naduh ka 3 tarik Jymmang.
“Mynta ka Congress kala iam na ka bynta ka Manipur haba ka jingsuk kala sdang ban wan. Kila dei ban iam ha ka por ba ka jinglong jingman ka dang itriem bha ha Manipur. Ha kato ka por ki khlem leit sha Manipur lane kren eiei halor ka Manipur. Mynta ka Manipur kala sdang jam sha ka lynti ba jai jai bad ka Congress kala sdang kren ia kane ka Jylla” ong u Himanta.
Ula ong ruh “Haba jar jar, ka Sorkar Manipur bad ka Ministry of Home Affairs kila iatrei khlem shongthait ban wanrah pat ia ka jingsuk bad ia ka jinglong jingman ba jai jai ha ka Jylla”.
Pule ruh: Da ki kynta sahkut ki nongleit nongwan ba kylla ka trok ha surok Bhoirymbong-Kyrdem
