Nongpoh, Naitung 01: Ki paidbah nongshong shnong ka thain Bhoirymbong-Kyrdem mynta ka sngi ki la sahkut da ki kynta ha ka leit ka wan jong ki namar ka jingkylla jong kawei ka trok kaba kit ia ka kali puh shilum hapdeng jong ka surok ha ka shnong Umket, kaba pyniasoh na Bhoirymbong sha Kyrdem.
Kane ka jingkylla ka trok kala wanrah ia ka jingdheng kali kaba jur ha ka thain ha kaba bun ki nongleit nongwan, ki nong leit iew leit hat kila hap ban shu bujli kali pateng tang ban poi sha ki jaka ba ki thmu ban leit.
Watla ha kane ka jingjia kylla ka trok kam shem la don kano kano ka jingjia kaba sngewsih, hynrei ka la pynsohsat ia ka leit ka wan jong ki paidbah ha kaba na ka liang ki bor pulit ka Khapmara Police Investigation Center (PIC) ki la poi marmar sha katei ka jaka ban pyniaid ia ki kali kiba la sahkut ha ryngkat ka jingbthah ruh ia ki nongleit nongwan ban bud thik ia ki jingpyniaid kali tang ban lait na ka jingdheng kali kaba jur.
Pule ruh: Bthah ka EGH ia ki paidbah ban kiar na ka jingleit shangkai sharud ki wah
