Nongpoh, Jylliew 30: Ka tnat treikam jong ka District Tuberculosis Officer Ri Bhoi District ha ka jingiatreilang bad ka ophis u BDO, Umling C&RD Block ka la pynlong ia ka prokram ban ai jingtip shaphang ka jingpang TB kum shibynta na ka jingiakhun ban pynduhjait noh ia kane ka jingpang hapoh u snem 2035.
Ia kane ka prokram la pynlong lyngba ka National Tuberculosis Elimination Program (NTEP) bad la wan ban iashimbynta da ki Rangbah Shnong na ki shnong bapher bapher kiba hap hapoh ka Umling C&RD Block.
Ki Nongai jingkren ha kane ka prokram ki dei u Dr. M Mawrie, State TB Officer, ka Dr. E Kalwing, District TB Officer, u Agriswar Das na ka Piramal Foundation, ka Kong N Tracy Kharbani, State Coordinator ACSM TB office nalor kiwei kiwei.
U Dr. M. Mawrie kum u wei na ki heh ophisar ka tnat TB ha ka jylla, u la pynpaw ba ka jingdon jong ki nongpang TB hapoh ka jylla hi ka dang long kaba heh bad tang hapoh ka Umling C&RD Block ki don kumba 90 ngut kiba ioh ia kane ka jingpang, kumta ka long kaba kongsan ban pynphriang ia ka khubor halor ka jingdonkam ban rat dyngkhong noh ia kane ka jingpang TB napoh ka ri kumba la angnud ruh da ka sorkar pdeng hapoh u snem 2035.
U la batai ruh halor ki dak ki shin ba kumno ki nongpang ki ioh ia kane ka jingpang, kum ka jingmih syep ha ka por mynmiet, ka jingjyrhoh, ka jinghiar kilo bad kiwei kiwei kumta la kyntu ia kito ki riew paidbah kiba don ia kum kine ki dak ki shin, ki dei ban mareh marmar sha ki jaka sumar kiba marjan bad ban phah khmih bniah mardor ban ioh jingsumar kaba paka ha ka por kaba biang.
Shuh shuh u Dr. Mawrie u la kyntu ia ki bor nongpyniaid shnong ba kin ai ka jingiatreilang ha ka jingiakhun ban rad dyngkhong noh ia kane ka jingpang TB bad la pyntip ruh, ba ka sorkar ka la pynmang da ka khusnam sha kito ki shnong ki bym don ki nongpang TB ha ki shnong jong ki lyngba ki C&RD Block bapher bapher.
Pule ruh: Ai jingkoit ka Bethany Hospital ia i Khunlung ba pang Khyllai da ka Peritoneal Dialysis
