Shillong Jylliew 29: U MLA ka West Shillong u Bah Paul Lyngdoh uba long ruh u Myntri ka Sorkar jylla ula ong ba ka jingeh kaba khraw kaba ka jaidbynriew ka mad kadei ka jingduna ban don ia ki Nongialam.
U Bah Paul ula kren ia kane hynne ka sngi Palei ha ka jingshah pynkup burom ha Ka Synjuk ki Shiphew Dorbar ha ka jingialang kaba la long ha Dorbar Hall jong ka shnong Lumdiengjri.
“Ngi don ia ki jingeh kiba khraw ha ka jylla hynrei ka jingeh kaba khrawduh kadei ka jingduna ban don ia ki nongialam ha ka jylla” ong u Bah Paul Lyngdoh bad ka bynrap, “Ki don ki nongialam kiba iaid ha ka dur jong ki masi iadur (Sidur) kaba ki briew ki ju leit peit ha ki sngi ìew hynrei ha ki lyngkha pat ki don ki Masi lur (Silur) ia kaba ym ju don ba peit watla ki trei shitom bha hi ruh”.
“Ka burom kam dei ka jong nga hynrei kadei jongu Blei namar nga la iaid ha ka lynti kaba eh. Nga ai khublei ia ki paidbah ba dei namar ka jingieid bad jingshaniah ba kila pynjop ia nga Saw sien kum u MLA bad Shisien kum u MDC” ong u Bah Paul.
Ula ong, ba ka elekshon kala kut, ki don kiba kyrshan bad don ruh ki bym kyrshan ia u, hynrei yn ym kheiñ nongshun ia ki bym kyrshan hynrei dei ban iaid noh ha ka lynti jong ka jingshai ban iakhun pyrshah ia ki kam sniew khamtam eh ia u drug ha ka imlang sahlang da kaba iatreilang ryngkat.
U Bah Paul ula ong, ba kum u MLA ula don ia ki jingthmu ban wanrah ia ki skhim bad ki projek bapher ha ka Constituency bad yn sa batai bniah bha ia kine kiei kiei baroh kham hadien.
Ki nongialam ka Synjuk ki Shiphew Dorbar kila pynkup burom ia u Bah Paul Lyngdoh uba la shah jied kum u MLA ka thaiñ bad kum u Myntri ka sorkar jylla.
Ki nongialam shnong kila ong, ba ka jingjop u Bah Paul iaka elekshon kadei namar ka jingieid jong u paidbah bad kila pynpaw ia ka jingkhmih lynti ba u Bah Paul yn theh ia ki kam pynroi ha ka Constituency khamtam haba u long ruh u Myntri ha ka sorkar jylla bad kila pynpaw ruh iaka jingdonkam ban leh eiei ban wanrah iaka jingkhuid jingsuba bad ka jingtynnad jing ki shnong ki thaw ha ka Constituency.
“Ngi kum ki nongialam shnong ngi sngewkmen ba u Bah Paul u bat ia ka tnad kaba iadei bad ka jingeh kaba ki shnong ki thaw ki mad na ka jingjyllei u drug. Ngin iatreilang ban ialeh ban rat dyngkhong ia u drok khamtam eh ban ioh rat dyngkhong ia ka jingdie drug naduh na ki tyllong” ong u Secretary ka Shiphew Dorbar u Bah Meban Lyngdoh uba long ruh Rangbah Shnong ka Sunny Hill.
Ki 10 tylli ki shnong kiba don ha ka Synjuk ki Shiphew Dorbar ki kynthup ia ka Lumdiengjri, Sunny Hill, Jaiaw Langsning, Dymmiew, Mawbah, Lymkshaid, Lower Mawprem, Nongsohphoh, Lama Villa bad ka Qualapatty.
Pule ruh: Lyngba ka kynhun Whatsapp ïoh jingiarap Ar tylli ki longïing
