Lyngba ka kynhun Whatsapp ïoh jingiarap Ar tylli ki longïing

Shillong Jylliew 29: Ka “Iarap ia ki – ha ka khyllipmat ba ki donkam eh”, kaba dei ka kynhun ha ka WhatsApp Group kala lah ban pynmih ia u synñiang ban iarap ia artylli ki longïing kiba don hapdeng ki jingeh hynne ka sngi palei.

Kawei ka dei ka longïing jong ka Kong Rimabila Nongbet Sohlang na ka shnong Mawrohroh, Nongspung Syiemship bad kawei ka dei ka jong ka Kong Linda Swer bad Bah Sdan Jaba na ka shnong Phanniewlah Rum, Lyngiong Lyngdohship.

U Sordar ka Shnong Mawrohroh Bah Dmar Rani ula ai khublei ia kane ka kynhun kaba la mih shakhmat ban iarap ia kane ka longïing ha ka por ba ki don hapdeng ki jingeh ha kaba la don ryngkat ki bahaïing bahasem bad katto katne ki nongshong shnong.

U kpa jong kane ka longïing u la khlad noh dang shen da kaba iehnoh ia ka kurim bad iaki hynriew ngut ki khun, kynthup ia iba dang san bnai bad kane ka longïing kala iakynduh ia ki jingeh ha bun ki liang bad ka ïing kaba ki shong ki sah ruh ka dei kaba khapngiah.

Katei ka kynhun kala aiti ia u synñiang ha ka kong Rimabila da ka Kong Revereen Dkhar kaba na Mawngap Lumparing iba iadonbynta ha kaban ia noh synñiang.

Ha ka jingleit aiti iaka jingiarap ha ka shnong Phanniewlah Rum la don ryngkat u Rangbah Shnong Bah Justin Kharbteng, ki riewrangbah, ki longkmie, ki samla kynthei bad shynrang bad ki bahaïing bahasem.

Na ka liang u Rangbah Shnong ula pynpaw ba ka long ka nuksa ba janai ia kiwei ruh kiba don ka mynsiem sngewlem ban kner ki kti ka jingiarap haba ki paradoh parasnam ki donkam iaka jingiarap.

Ula iathuh ba na ka liang ki nongshong shnong ruh ki la lum ia u synñiang katba mih ban iarap ia kane ka longïing kaba mad ia ka jingeh na ka jingshitom jong arngut ki khun ba dang ar snem, ar bnai bad ka kmie ruh kam don ka met ba koit ba khiah naduh ba ioh ia i khun barit, kumjuh u kpa u don ha ka met bym da shait da khlain.

U samla Sainkupar Sunn na ka shnong Mawkalum uwei na ki dkhot kane ka kynhun u la aiti ia u synñiang ha ka Kong Linda bad la ialam ia kane ka kynhun ha kane ka sngi, da u Bah Staising Kharbteng uba long u nongsaindur ia kane ka kynhun ha ka jingdon ryngkat ki katto katne kiba la noh ia u synñiang.

Ula pynpaw ka jingsngewnguh ia baroh kiba la iadon bynta ban pynmih ia u synñiang na kylleng sawdong ka Bri u Hynñiewtrep kynthup ia ka Khasi Students Union, Tyrsad Circle bad kiwei kiwei kaba la iadon bynta ban noh ia u synñiang.

Pule ruh: Iashimbynta 42 ngut ha ka 8th Meghalaya State Shooting Championship