Tura, Jylliew 28 : Ki riew paidbah kila ioh ban pyllait ia kawei ka Kynthei kaba shah rahbor, shah shoh dusmon bad shah teh shah khum ha uwei u riew runar, na kawei ka surok kynjah kaba don ha ka shnong Rangmalgre, East Garo Hills District.
Kane ka jaka ba lap ia kane ka Kynthei ka dei kaba hap hapoh ka Chiading Police Station, kaba iaid lyngba ka State Highway bad kaba pyniasoh ia ka Chiading sha Williamnagar bad ter ter sha Nongstoin bad Shillong.
Ki paidbah ki pyntip ba ha ka por 6:30 baje jong ka janmiet sngi Ba-ar, kila iohsngew ia ka jinghylla jong kawei ka Kynthei bad mar mar kila bat ia kane ka kali kaba iaid lyngba ka shnong jong ki.
Ki iathuh ba ha ka jingtalasi ia ka kali ila shem ia kane ka Kynthei hapoh kali, bad ia ka shyntur bad ryndang jong ka, lah teh da ka cellotape. La shem ruh ba ka durkhmat jong ka, kala mong ia kaba lasuba jur ba kala shah shoh ha une u briew.
Une u briew ba niah ia ka kali, haba tohkit, ula kynnoh ba kane ka Kynthei kala shukor ia u hadien saw snem ka jingiadei samla bad u. Namar ka jingbitar, ula leh ia kane ka kam pyntriem bad pynshitom ia kane ka kynthei. Hynrei, shuwa ba ki paidbah kin kem ia u, une u briew ula lait phet da ka kali jong u hi.
Ki Pulit ka East Garo Hills kila pynlong ia ka jingthwet kaba jur ban lapdien ia une u briew bad ia ka kali.
