Shillong, Jylliew 27: Ki Ophisar kaTnad Fisheries hynne ka sngi Ba-ar, kila leit test ia ki dohkha ba wanrah na shabar ka Jylla ha Iewduh ban tip la ka don ka jingkhleh dawai formalin ne em ha kine ki dohkha kumba la lap dang shen da ka Tnad Food & Safety ka Jylla.
Ia kane ka leh hadien ba ka Sorkar kala khang ia ka jingwanrah dohkha haduh 15 sngi na shabar ka Jylla. Ia kane ka test la leh ha Iewduh ha kaba ki Ophisar kila shim nuksa ruh na ki dohkha baa wanrah da ki trok ban iewduh ban leh test thikna.
Haba iakren bad ki nongthoh khubor, ki Nongdie dohkha kila pynpaw ia ka jingeh ba ki iakynduh na ka jingslem ban ioh pdiang ia ki kaiphod halor ka jingleh test ia ki dohkha ba wanrah na shabar ban tip la ki dei kiba khlem formalin ne em.
“Ki dohkha ki dei ki mar ba pyut kloi lada ym lah die kloi. Ngi kyrpad ia ka Sorkar ba kan ai ia ki kaiphod jong ki jingleh test hangto hangto hi ha jaka leh test khnang ba kan nym ktah ia ka iew” kyrpad ki nongdie dohkha.
Ia kine ki dohkha ba leh test ki dei kiba wanrah hynne hi ka sngi Ba-ar bad ki kynthup naduh ki khabah bad kiwei kiwei ki jait dohkha.
Ha ka sngi Saitjain, ka Sorkar kala weng noh ia ka hukum ba khang ban siew ia ki dohkha ba wanrah na shabar ka Jylla.
