Shillong, June 23: U Myntri tnad Bording Abu Taher Mondal hynne ka sngi Thohdieng ula ong ba ka jylla Meghalaya kaba mad ia ka jingeh ha ka jingpynmih iaka bording lyngba ka um, kala dei ka por ba kan wad ia ki lad ki lynti da kawei pat ka rukom pynmih iaka bording haba phaikhmat sha ki Renewable Energy ne ka tan bording na ka Lyer bad ka Sngi.
U AT Mondal ula kren ia katei ha ka seminar kaba la pynlong da ka Centre for Science and Environment (CSE) bad Association of Renewable Energy Agencies of States (AREAS), hapoh ka Ministry of New and Renewable Energy (MNRE).
Ula ong, ba nalor ka jingpynmih iaka bording na ka um ka dei ruh da kaba pynmih iaka bording lyngba ka Renewable Energy ia kaba ka sorkar ka dang phaikhmat bha mynta.
Haba kren halor ka mat ha kaba iadei bad ka jingrem dor jong ka Renewable Energy, u Mondal ula ong, ba kan dei ka jing shimkhia jong ka sorkar ban pyniasoh da ka Renewable Energy sha ki kam bapher bapher bad kumjuh ruh ki tnad Sorkar.
Ula ong ba kane kadei ka lad iaka jylla Meghalaya, kaba iakhun iaka jingtynjuh jong ka jingduna ka bording, kaba ka sorkar ka ialeh ban kyntiew khnang ba ki jaka ha nongkyndong ruh kin lah ban ioh iaka bording bad ka sorkar kala shimkhia ruh ban pynpoi iaka bording ka ban long kaba lah kot bor ban siew da ki riewpaidbah.
U Mondal ula ai khublei ruh ia ka Ministry kaba la pynlong ia kane ka seminar ha kane ka thaiñ namar ka long ka kabu kaba biang bha iaka jylla bad iaka thaiñ ban shimkabu ia kiwei pat ki lad lyngba ka New & Renewable Energy ikhnang bay n lah ban pyndap iaka jingduna ka bording ha ka jylla.
Ka jingthmu jong kane ka Seminar ka long ban wad shuh shuh ia ki lad bad ban sngewthuh ia ka jingkot bor ki jylla haka thaiñ shatei lam mihngi ban ioh iaka bording kaba khuid.
Ha kane ka seminar la wan ban iashimbynta da ki tnad sorkar bapher kaba kynthup ruh iaka Centre for Science and Environment (CSE), Association of Renewable Energy Agencies of States (AREAS), IIT Guwahati bad North East Centre for Technology Application and Reach (NECTAR).
Pule lang ia kane: Pan jaka ka KHADC ha New Shillong ban pynkynriah noh ia ka Ophis ka Council
