Lashem bnai yn sdang iakynduh ki Regional Committee ka Assam-Meghalaya
Shillong, Jylliew 23 : Ka Sorkar Meghalaya Democratic Alliance (MDA) kala kut jingmut ban iasaid katba lah ha kaban pynioh pat ia ka Block-I bad Block-II sha Meghalaya ha ka jingiakren pynbeit pud jong ka wat kaba ar.
Ia kane la pyntip da u Symbud Myntri Rangbah ka Jylla Bah Prestone Tynsong hynne ka sngi Thohdieng, hadien ba wai ka jingialang jong ka Regional Committee ka Ri-Bhoi District, kaba u khlieh kum u Chairman.
U Bah Prestone ula pyntip ruh ba ki Regional Committee na baroh artylli ki Jylla-ka Meghalaya bad Assam kin sa iashong jingialang lang noh naduh u bnai Naitung ban iakren ia ka jingiakajia pud haba phai sha ki 4 tylli ki sector ba hap hapoh ka Ri-Bhoi District.
“Ngin sa pynbeit ia ka jingialang bad ka Regional Committee na Assam bad hadien kane ka jingialang, ngin sa ialeit jurip ia ki shnong ki thaw ba don ha ka jingiakajia bad ngin sa shim ia ka rai halor kane ka kam” ula ong.
Ula ong, haba phai sha Ri-Bhoi District, ki don 4 tylli ki sector kiban iapynbeit pud bad kine ki dei ka Borduar, Nongwah-Mawtamur, Deshdoomreah bad ka Block-II, ha kaba ki Regional Committee na baroh arliang ki donkam ban iashong bad iatai bad sa shim rai ia kaei kaba donkam ban leh.
Haba pynpaw ba ia kane ka juh ka rukom yn leh ruh ha kaban wad ia ka lynti ban pynbeit ia ka jingiakajia, u Bah Prestone ula ong “Ka jingkwah bad ka mon u paidbah kan dei shibynta na ki kyndon treikam jong ka Committee. Namar kata, ki kyndon treikam kila don naduh ka kylla ba nyngkong bad kane ka kylla ba-ar ruh kan iaid ha kajuh ka rukom iapynbeit”.
U Bah Prestone u pyntip ba ka Sorkar ka don ia baroh ki kot ki sla ban pynksan iala ka jingkam halor kine ki saw tylli ki jaka bad bynrap “Ta ka daw, ngin sa iashong bad ki paralok na Assam bad ngin sa iathir iatai ha ka miej iakren bad ngin sa iahiar sha ki Shnong bad sa shim ia ka rai ba khatduh”.
Halor ka jingdawa ban pynioh pat ia ki Shnong kiba hap hapoh ka Block-II sha Meghalaya, u Symbud Myntri RAngbah ula ong ba lada phi kren shaphang ka Block-I bad Block-II, ka dei ka jingkylli ban pynphai pat hynrei bun ki briew ki sngewthuh bakla ia kane.
“Haba phi kren halor ka Block-I bad Block-II, sngewbha sngewthuh ba ka jingkylli ba don jingiapher kam mih satia, ka jingkylli ba iakajia ruh kam mih satia. Ka dei beit tang ka jingpynphai pat ia ka Block-I bad Block-II halor ka notification u snem 1951, kaba ngin buh hakhmat ka Sorkar Assam ba kan sngewbha ban pynphai noh sha ngi ia kine ki jaka kiba ki nongshongshnong kiba bun hi ki dei ki jong ngi” ula ong.
Nalor kane, u Bah Prestone ula ong ba hadien 50 snem ka jingioh iala ka Jylla, ka dei tang ka Sorkar MDA kala la shim ia ka nongrim kaba skhem ban pynbeit noh ia ka jingiakajia pud bala sahteng la slem bah bad ka Assam.
Ka Meghalaya bad ka Assam kila dep iasoi ruh ia ka MoU ban pynkut noh ia ki jingiakynad jong ki 6 tylli ki jaka bala dep iapynbeit ha ka wat ba nyngkong jong ka jingiapynbeit pud.
Halor ka jingpyrshah ia ka MoU, u Bah Prestone ula ong “Ngi la dep leh ia ka kylla ba nyngkong, hooid, kiba bun ki jaka ba bun ki Nongshongshnong ka Meghalaya kila ong hooid phi lah dei ia kaba dei hynrei ki don katto katne kiba em, ka Sorkar kam shym la leh eiei bad ka Sorkar kala die ia ki jaka bad ai ei sha ka Assam hynrei kaei kaba nga ong ha phi, ngi la leh ia kane na ka bynta ka bha ka miat bad ka jingmyntoi jong ki pateng ban dang wan jong ka Jylla…namar kata, ngin jam beit shakhmat ban pyndep ia ka kam”.
Pule lang ia kane: Pan jaka ka KHADC ha New Shillong ban pynkynriah noh ia ka Ophis ka Council
