Guwahati, Jylliew 22 : Palat 1.2 lak ngut ki nongshongshnong jong ki 10 tylli ki District ka Assam kila shah ktah jur ha ka jingshlei um na ka jingwan u slap ba khlem sangeh mynta la bun bun sngi.
Ka jingiai ther u slap ha kylleng ki jaka ka Assam, kala nang pynngam ia kiba bun ki jaka thymmai ha kine ki 10 District bad kala nang pynbun ruh ia ki briew kiba shah ktah.
Ki District kila shah ktah jur eh ki dei ka Baksa, Barpeta, Darrang, Dhemaji, Dhubri, Kokrajhar, Lakhimpur, Nalbari, Sonitpur and Udalguri.
Kat kum ka jingong ka ASDMA, ka Nalbari District ka dei kaba shah ktah jur eh ha kaba haduh 45000 ngut ki briew kila hap ban kynriah sha ki jaka padun.
“Kumba 780 tylli ki Shnong kila don shapoh Um. Haduh 10,591.85 hectare ki jaka rep ruh kila shah pynjulor ha kane ka jingshlei um” ong ki heh ka ASDMA.
Ha kawei ka liang, ka Indian Meteorological Department (IMD) kala pynmih ia ka ‘Yellow Alert’ hapoh ka Jylla ka ban long naduh ka 22 tarik Jylliew haduh ka 23 tarik Jylliew.
Ka IMD kala iathuh lypa ba kan don ka jingther u lapbah ha kylleng ki jaka ka Assam ha kine ki khyndiat sngi ban wan.
Pule lang ia kane: Manipur : Khot u Amit Shah ia ka jingialang ki seng sain pyrthei ban lah wanrah pat ia ka jingsuk
