Shillong, Jylliew 22 : Ka Meghalaya Indigenous Minority Tribes’ Forum (MIMTF) kala dawa ia ka Sorkar Jylla ba kan ai 15% ka bhah iohkam ia ki paid riewlum Rabha, Boro, Koch, Hajong bad ki Man ka Ri-lum Garo na ka State Reservation Policy ka Jylla.
Ha ka dorkhas bala aiti sha u Myntri Rangbah ka Jylla Conrad K Sangma, ka Forum kala ong “Ngi da kyrpad rit ia phi ban sngewbha mynjur lem ban ai ia ka bhah ba 15%, ynda la bishar bad pynkylla thymmai ia ka Reservation Policy ka Jylla, sha ki riewlum ritpaid ka Meghalaya khamtam ki Hajong, Koch, Rabha, Boro-Kacharies bad ki Man, kum ka jingailad ba kin kiew bad iakot kyrdan bad ki Khasi, Jaintia bad Garo”.
Kane ka dorkhas ka dei kaba la soi da ka Meghalaya Hajong Welfare Association, Meghalaya Rabha Jatio Sewa Sangha (MRJSS), Meghalaya Koch Association, Meghalaya Boro Sahitya Sabha bad ka All Mann Tai Speaking Welfare Association.
“Lada mynjur, ngi sngew, kane kan khyllie noh ia baroh ki jingduhnong kaba ngi la mad ha kine ki 51 snem haba phai sha ka jingiohkam Sorkar bad ruh ha kiwei kiwei ki bynta kum ha ka pule ka dangle, ka ioh ka kot bad kiwei kiwei” kala ong.
Haba pynpaw ba ki dei ki Nongshongshnong ba pura ka Jylla Meghalaya, ka Forum kala ong ba kum ki Khasi, Jaintia bad ki Garo, ki ruh ki dei ki “paid riewlum trai ri” haba bynrap ba ki Karb/Marngar (Dimasa) ba sah ha Ri-Bhoi District ruh ki dei ki paid riewlum trai ri jong ka Jylla.
“Ha kane ka Job Reservation Policy ba mynta, kaba long 40 % ia ki Khasi bad Jaintia, 40% ia ki Garo, 15 ia ki General bad 5% ia ki OT bad Schedule Caste, watla ka bhah jong ngi ka long 5% hynrei ka jingshisha pat ka long tang 2% lada ym duna namar ngi hap ban iasam lang bad ki Scheduled Caste bad kiwei kiwei ki riewlum na shabar ka Jylla kum ki Naga, Mizo bad kiwei kiwei” kala ong.
Pule lang ia kane: Phah kynriah ki bor District ia ki briew ba sah ha ka Iing ba jan twa ha Lachumiere
, Meghalaya Koch Association, Meghalaya Boro Sahitya Sabha bad ka All Mann Tai Speaking Welfare Association.){kind=link}