Shillong, Jylliew 21 :Iwei I Khynnah Kynthei iba dei I lanot shah leh beijot ba hap hapoh ka case POCSO, ila dkhat jubor iala ka jong ka jingim ha u tyllai phasi hynne ka sngi Balang, ha Shelter Home jong ka Tnad Social Welfare, Mawdiangdiang.
Kat kum ka khubor bala ioh, kane ka jingjia kala jia hynne por mynsngi bad ia ka met jong ine I khynnah la rah noh sha NEIGRIHMS ban pyndep ia ka post mortem.
Ka khubor ka iathuh ba ine I Khynnah bala kynjoh ruh ia ka jinglong samla lud, ila dkhat jubor iala ka jingim da kaba sdien phasi ha kawei na ki kamra jong kane ka Shelter Home.
Ki Heh Pulit ka Jylla kila pynthikna ia kane ka jingjia jong ine i Khynnah Kynthei hynrei kila pynpaw ba ka tnad Social Welfare ka dei kaba biang eh ban ai ia ki jingtip shaphang ka jingjia.
Lah ioh jingtip ba ki Heh Ophisar ka Tnad Social Welfare kila her pynsted hynne ka sngi sha katei ka Shelter Home ban tohkit ia kane ka jingjia.
Ka khubor ka iathuh ba ine I Khynnah ila mad ia ka jingjia ba sngewtriem ha u bnai Naiwieng jong u snem bala lah namar ka jingshah leh beijot hala u jong u Kni. Ia kane ka case la register ha Mawngap Police Station.
Na ka bynta ka jingshngain, ia ine I Khynnah la shimti ban khmih da ka Child Welfare Committee, kaba la pynbeit ia ka jaka sah ha Shelter Home ha Mawdiangdiang.
Kat haduh ba thoh ia ka khubor, ym pat lah satia ban ioh ia ki jingtip ba kumno kane ka jingjia kala jia.
Lah ioh jingtip ruh ba ka Meghalaya State Commission for Protection of Child Rights (SCPCR) kala shim case halor kane ka jingjia.
