Shillong, Jylliew 21: U Myntri ka tnat pule ka jylla Rakkam A Sangma hynne ka sngi Balang, ula pynkup burom iaki khynnah pule kiba wan shakhmat haka eksamin Socondary School Leaving Certificate (SSLC) 2023.
Ia kane ka Prokram la pynlong hapoh ka District Auditorium Tura haka jingdon lang u Chairman ka Meghalaya New and Renewable Energy Development Agency (MNREDA) u Rupert Momin, u nongai buit iaka tnat pule u bah Himalaya Shangpliang, u Commissioner bad Secretary ka tnat u Pravin Bakshi, u ka Director School Education and Literacy u Swapnil Tembe lem bad ki Deputy Commissioners (DC) jong baroh 5 tylli ki district ka Garo Hills, ki Principals bad ki khynnah pule.
Haba kren ha kane ka sngi u Rakkam A Sangma ula ai khublei iaki khynnah pule, ki nonghikai kiba la wanrah iaka nam burom iaka thain Garo Hills baroh kawei bad ula ong ba kane ka dei tang ka jingsdang jong ki khynnah pule ba kin nang kiew shakhmat.
Haba kyntu iaki khynnah pule ban nang trei shitom, u Rakkam ula ai jingmut iaki khynnah pule ban long kiba tista ban pule bad kiba kloi ban wad ki lad lynti kumno ban pyllait ialade naki jingeh haba ki iakynduh haka pule puthi khnang ba kin lah ban kyntiew iaka thain bad ka jylla baroh kawei.
Nalor kane, u Rakkam ula iathuh ba naka liang ka tnat pule ka sorkar jylla ka ialeh ban wanrah ki jingkylla hapoh ka tnat khnang ban lah shuh shuh ban kyntiew iaka pule puthi hapoh ka thain bad ka jylla baroh kawei.
Ula iathuh baka sorkar lyngba ka jingialam da u myntri rangbah ka jylla u Conrad Sangma ka donkam ka jingiatreilang bad ki nonghikai khnang ban wanrah ka jingkylla naka bynta ban pynthikna ba ki khynnah bad samla pule kin lah shuh shuh ban wanrah nam bad burom iaka thain bad ka jylla baroh kawei.
Naka liang u Chairman ka MNREDA u Rupert Momin ula pyntip iaki buit kumno ban pynkhreh ialade haki jingpule khnang ban ioh iaka nam bad burom.
Haba khublei iaki khynnah ba wan shakhmat u nongaibuit shaka tnat pule u bah Himalaya Shangpliang ula iathuh ba kum ia kine ki pokram la leh naka bynta ban ai mynsiem bad ban pynshlur shuh shuh iaki samal ba kin nang iai treishimtom ha ki snem ban wan.
Ha kane ka sngi u Myntri ka tnat Pule u Rakkam A Sangma ha ryngkat u Chairman ka MNREDA Rupert Momin, u nongaibuit ka tnat pule bah Himalaya Shangpliang kila pynkupburom iaki ba wan shakhmat haka eksamin SSLC ba kynthup ia 1st Rank Samridhya Das napoh ka Sherwood Sec. School, 3rd position Ritam Deep Choudhary bad ka Salrime M Sangma na Sherwood Sec. School bad St. Xavier’s Sec. School, 4th position Ronggrik B Sangma na Aeroville Sec. School, 6th position Sanskrita Karmakar na Sherwood Sec. School, 10th position Pallavi Penang na St. Mary’s Public School, Tikrikilla, 17th position Riktean M Marak bad Shelim Islam na Aeroville Sec. School bad Bhaitbari Sec School, 18th position Joyrani Das bad Raqib Raonaq Abtahee na Jawaharlal Nehru Sec School, Phulbari bad Janapriya Sec. School Bholarbita.
