Shillong, Jylliew 20 : U MDC ka Mawsynram Bah Alvin Sawkmie hynnin ka sngi Nyngkong, ula ai ia ka shithi iehnohkam kum u Deputy Chairman ka KHADC ban ai bujli ia ka shuki sha u MDC ka Congress Bah Charles Marngar, kum ka jingpynskhem ia ka kynhun Khasi Hills Democratic Front (KHDF).
Une u MDC ka Mawsynram ula aiti ia ka shithi iehnohkam ha u Chairmam ka Council Bah Lamphrang Blah ha ka jingia don ryngkat u Chairman ka KHDF Bah Pyniaid Sing Syiem.
Namar kane ka jingiehnohkam, ka shuki Deputy Chairman kala lait thylli. U Chairman ula pynbna ba ka elekshon Deputy Chairman kan long ha ka sngi Balang bad la buh ba ki kyrtong ba thmu iakhun ia kane ka elekshon, kin hap ban pyndep ia ka jingthep kyrteng mynta ka sngi ban sa pynbud da ka jingbishar kyrteng.
Kat haduh ba thoh ia ka khubor, la ioh jingtip ba tang u Bah Charles Marngar uba la thep kyrteng kum u kyrtong jong ka KHDF ban iakhun ha kane ka elekhson.
U Bah Charles mynta yn shu ap s tang ia ka jingpynbna jong u Chairman hapoh ka dorbar kaban long ha ka sngi Balang ba yn shimti pura iaka shuki Deputy Chairman jong ka KHADC.
Katkum ki khubor ba la iohlum la iathuh ba u Bah Alvin la iehnohkam ban plie lad ia u Bah Charles ba un shimti noh ia ka kam Deputy Chairman katba ialade yn leit ban shimti noh kum u Executive Member ha ka Executive Committee kaban ialam da u Bah Pyniaid Sing Syiem.
.){kind=link}