Shillong, Jylliew 19: Ki Pulit ka Anti Narcotics Task Force (ANTF) ka East Jaintia Hills District, hynne ka sngi Nyngkong, kala ioh ban kem ia arngut ki nongkhaii droks na kawei ka kali ha Nongsning bad ioh kyrup haduh 2.738 kilo u heroin.
Ia kine ki briew la ioh kem na kawei ka kali Tata Winger NL07-T-0815 bad la ithuh kyrteng ia ki da u M Tuanbiaklian Guite ban a Manipur bad u Imliakum Longkumer ba na Dimapur, Nagaland.
Kat kum ka jingpyntip u Superintdent of Police ka East Jaintia Hills, ka kynhun ANTF kala pynap shrip ia kine ki arngut hajan BMS Fuel Station Nongsning halor ka jingioh khubor ba kine ki arngut kin wan da kane ka kali ba kit droks.
La pyntip ba dei ha ka por 6:15 janmiet ba ki pulit kila ioh bat ia kane ka kam bad ha ka jingtalasi, kila ioh ban kurup haduh 200 tylli ki synduk sabon kiba don ia u powder rong stem ia uba la lah ban pynthikna da ka jingleh test ba u dei u heroin.
Ka ANTF kala register case ia kine ki nongkhaii droks hapoh Khliehriat Police Station bad ka jingtohkit mynta kala iaid shakhmat.
Nalor u droks, ki pulit kila kurup ruh ia ka pisa ba T. 2500, artylli ki mobile phone lem bad ia katei ka kali ba ki pyndonkam.
