Shillong, Jylliew 19: Ka Myntri ka tnad ka koit ka khiah Kong Ampareen Lyngdoh hynne ka Lah Sngi U Blei kala pyntip ba ka tnad ka Koit ka Khiah ka dang pynkhreh iaka jingthoh ban tyrwa ha ka jingialang jong ka kynhun Myntri halor ka lynti kaba bha tam ha kaban pyntreikam naka bynta ka Shillong Medical College.
Haba iakren bad ki nongthoh khubor ka Kong Ampareen kala ong “Kial don kattokatne ki jingai jingmut ia kaba ki dang iakren bad iatai mynta.Ki don ar jait ki jingai jingmut. Kawei kadei da kaba pyntreikam da ka PPP Mode ia kaba lah ban pyndonkam da ki kynhun shimet ne ka long ne em ban ioh iaka jingiatreilang bad ki Services jong ka sorkar kiba la don lypa kiba don hapoh ka nongbah Shillong ne ha kiwei pat ki jaka hajan ka nongbah Shillong.
Hato lah ne em ban don iaka medical college kaban lah ban pyndonkam iaka Shillong Civil hospital, Ganesh Das hospital, Reid Chest hospital, kan long ne em ban pynkylla ia kitei ki jaka sha ki jaka pule kaba lah ban pynmih iaka Medical College na ki jingdon jingem kiba la don lypa hapoh ka jylla”.
Ka la ong baka tnad ka koit ka khiah ka dang peit iaka jingai jingmut ban iatreilang bad ki skulbah lehse kiba don hapoh ka Ri Bhoi district ban tei iaka Medical College.
“Ngi dang peit ruh iaka jingthmu ban iatreilang bad ki skulbah kiba treikam bha hapoh ka jylla Meghalaya lehse khamtam eh ha ka Ri Bhoi district ha kaba ki don bun ki skulbah jong ki riewshimet kiba la treikam lypa hato ka long ne em ba kino kino na kitei ki skulbah kin iatreilang bad ngi lyngba ka PPP mode. Kane ka long khamtam eh ha kaba iadei bad ka thain Khasi-Jaintia Hills,” ong ka Myntri sorkar.
Ha kawei pat ka liang, ka Kong Ampareen kala iathuh ba ka jinglong jingman ka Tura medical college kala iaid bha shakhmat.
“Nga la ioh pdiang ia ki jingtip bad shen ngan leit sha Tura ban pynthikna ba ngin pynsted ban buh ia kijingdonkam baroh kibangi dei ban buh haka medical college khnang ba kan lah ban treikam pura. Ki don katto katne ki kyndon jingbthah kiba ngi hap ban bud ryntih iaki kyndon jongka MCI bad kiwei kiwei ki kyndon. Shisien ba ngi la pyndep ia kitei bad shisien ba ngi la buh ia ki jingdonkam, kumta ka Tura medical college kam dei ban shim por than” ong ka Kong Ampareen.
Kala ong ba kam kwah ban ai kano kano ka jingkular ioh lehse yn ym lah ban pynurlong iaka jingbuh thong hynrei ki paidbah ka rilum Garo kidei pat ban tip ba kila trei shitom bha ban pynthikna ba ka Tura medical college kan sdang treikam pura noh shen.
Ka Kong Ampareen kala iathuh ruh ba dang shen kala ioh ban iaphylliew jingmut bad u Myntri Rangbah ka Assam u Himanta Biswa Sarma halor ka jingthmu ban tei ia ki medical college ha Assam.
Kala ong ba ka Assam ka pyndonkam ia ki jaka ai jingsumar kiba don ha kylleng ki district bad kyntiew ruh ia ki sha ki medical college namar kila lah ban pyndep ia ki jingbuh kyndon kiba donkam na ka bynta ban long ki medical college kiba pura.
“Ngi ngeit ba ka Meghalaya kan lah ban iaid shakhmat kum ka jylla Assam. Lada ka Assam ka lah ban leh, kumta ka jylla Meghalaya ruh kadei ban lah ban leh,” ong ka Kong Ampareen.
Pule ruh: Pynkhie im ka Sorkar ia ka ANTF ban iakhun ia ka thma pyrshah ia u Droks
