Shillong, Naitung 08: U Myntri Rangbah ka Jylla Conrad Kongkal Sangma, ula pynbna hynne ka sngi thohdieng, ba ka Sorkar Jylla kala buh ia ka mang tyngka ba T. 300 klur ban kynshew ha ka jingpynjanai bad kyntiew ia ka pule ka dangle jong ki Khynnah Rit hapoh ka Jylla.
Kane ka song pisa ka dei kaba wan na ka Externally Aided Project bad kin sa don shibun ki prokram bapher bapher ki ban pynthikna ba ki Khynnah kin heh kin san ha ka sawdong sawkun kaba ka jinghikai ba ki ioh kan long kaba lah ban tei.
U Myntri Rangbah ula pynbna ia kane haba plie ia ka Building ba thymmai jong ka Directorate of Education Research and Training-Annexe ha Malki Shillong, ha ka jingiadonlang u Myntri ka tnad pule puthi ma Lahkmen Rymbui bad MLA ka East Shillong Kong Ampareen Lyngdoh.
Haba kren ha ka jingialang, u Myntri Rangbah ka Jylla u la ong “Ka Sorkar Jylla kala kynshew ia bun ka pisa ban pynkhlain biang ia ki jaka pule, ki jinghikjai ia ki Nonghikai naduh ki jaka nongkyndong khnang ban pynthikna ba ki jingai jinghikai jong ki kan long kaba lah ban ban sngewthuh da ki Khynnah”.
Kat kum ka jingong jong u, ka Meghalaya ka dei kawei na ki katto katne ki Jylla jong ka Ri ka ba la pynsdang ia ka Early Childhood Education programme. U ong ba ka thong jong kane ka prokram ka long ban pynthikna ba ki Nonghikai kin shimkhia ia ka jingkot ka bor sngewthuh jong ki Khynnah haba ai ia kano kano ka jinghikai.
Haba kren halor ka jinglehbha jong ki Khynnah ha ki Eksam ba kham heh kyrdan, u Myntri Rangbah ula ong ba ka jingeh hi ka dei namar ka jingduna bad ka jingbym biang ha ka jingai jinghikai ha ki Pre bad Elementary Level bad namar kata, ka Sorkar kala wanrah ia ka lad ka lynti ban ai ia ka jinghikai kaba biang pura ia ki Khynnah naduh ba ki dang rit ka rta.
U Conrad u la ong ba ka Sorkar ka la buh ia ka mang tyngba ka T.300 klur na ka Externally Aided Project ban kynshew ha ka Early Childhood Education programme.
U Myntri Rangbah ula ong ba ka kam pule puthi ka dei kaba la shimkhia bha da kane ka Sorkar ba mynta bad lyngba ki kam bapher bapher bala shim halor ka jingthmu ban kynjoh ia ka thong ba kham heh kata ha ka ban pynlong ia baroh ki nongshongshnong ba kin lah synniang lang sha ka jingkiew irat jong ka Jylla.
Haba kren halor ka jingrah ia ka Meghalaya kum ka Top Ten na ki Jylla hapoh ka Ri ha kine ki 10 snem ban wan, u Conrad ula ong ba ki Nonghikai ki lah ban shim ia ka bynta ba kongsan eh ha kaban saindur ia ki samla, ki ban long ki nongshongshnong ba tei iala ka jong ka Ri. U la kyntu ruh ia ki Nonghikai ba kin pyntbit ialade da ki buit hikai ba kham janai kat kum ka jingiaid ka por.
Haba kren halor ka Training Institute, u la ong “Ha DERT, ngin ym pynkut tang ha ka jingai jinghikai ia ki Nonghikai hynrei ngin iatreilang ruh ban pynthikna ia ka jingmyntoi kaba bun jong ka Jylla ha kaban pynwandur ia ka lawei jong ki Khun ki Kti jong ngi bad ka Jylla”.
