Guwhathi, Jylliew 15: Lai ngut ki samla na Meghalaya kila shah rahbor ha ka kynhun ki runar na Assam katba ki dang leit thied ktung ha ki thain Jagiroad.
Kine ki lai ngut ki samla ki kyrteng u Fainali Nanglein, Jolanki Nanglein bad u Ribatomi Khalem, kiba dei na Jowai, West Jaintia Hills District. Kane ka jingshah rahbor kala jia hynnin ka sngi Balang.
Kat kum ka khubor Pulit, kine ki samla kila leit sha Jagiroad, Assam ban thied ktung hynrei la iathuh ba ka kynhun ki runar kila pynbiej ia kine ki laingut sha leit peit ktung sha kawei ka Iing ha Amlighat pynban ynda poi ha kane ka iing, kila set kut ia kine ki samla ha kane ka Iing bad phah jingtip sha ki bahaiing ryngkat ka jingdawa pisa haduh T.10 lak ban pyllait.
Ki pulit ka Jowai Police Station haba ioh jingtip ia kane ka jingjia, kila pyntip mar mar sha u Officer-in-Charge ka Jagiroad Police Station kiba la pynlong ia ka jingthwet kaba jur bad tang hadien katto katne kynta, kila lapdien ba kine ki samla kila don ha kawei ka IIng ha Sindhichar kaba don marjan ka Amlighat.
U Superintendent of Police ka Marigain Hemanta Kumar Das ula pyntip ba ki Pulit kila pynlong ia ka jingkhynra da kaba bud ia ka mobile tracking bad kila ioh ban pyllait ia kine ki samla na ka kti ki nongrahbor.
U pyntip ba ki Pulit kila thwet jur ia kine ki runar ba donkti bad kila ioh ban kem noh ia 4 ngut napdeng kine ki runar na Hojai bad Nagaon District.
Kine ki 4 ngut ki runar ki kyrteng u Abdul Hannan uba na Joynagar kaba hap ha Murajhar Police Station jong ka Hojai Disrict, u Habib Ahmed uba na Charing Pathar kaba hap ha Murajhar Police Sation, Hojai District, u Fatir Ahmed na Changmaji kaba hap hapoh ka Doboka Police Station, Hojai District bad u nongniah kali u Manav Jyoti Konwar n aka Chekoni Gohai Gaon kaba hap hapoh ka Jakhalabandha Police Station, Nagaon District.
Une u Heh Pulit u pyntip ba sa arngut ki runar ki dang jah rngai bad ka jingthwet ban iohkem ia kine ki runar kala iaid shakhmat.
U Das u pyntip ba ki Pulit kila kurup noh ruh ia kawei ka Bolero Pikup trok ba don u nombor ML04-D-4262 bala pyndonkam da kine ki runar.
Kat kum ka khubor, kane ka kynhun ki runar kala knieh ruh ia ka song pisa ba T. 20,000 bad ki sati ksiar na kine ki samla. Nalor kane, kine ki runar kila pynbat ruh ia u ata ha ki kti jong kine ki samla na Meghalaya bad ring video haba byrngem ruh ban phah ia kine ki video sha ki bahaiing hasem jong ki bad ban aiti ruh sha ki Pulit halor ka jingkynnoh ba ki dei ki Nongkhaii droks.
