Guwahati, Naitung 08: U nongialam ka AIUDF u Badruddin Ajmal hynnin ka sngi Palei u la kam ba ki kpa tymmen ki jong u ki dei ki Hindu.
U Ajmal u ba dei ruh u president jong ka Assam State Jamiat Ulama (ASJU), bad u MP ka Lok Sabha napoh Dhubri constituency ka Assam u la ong ba ki kpa tymmen jong u ki dei ki Hindu bad ki la hap ban kylla sha ka niam Muslim namar ka jingshah thombor ha ka kynhun ka ba rit jong ki Hindu, hynrei u la bynrap da ka ba ong ba um shym la shah pynbor satia ban kylla niam.
Da ka ba kynthoh pyrshah ia ka RSS bad ka BJP, u Ajmal u la ong, “Ki mat treikam jong ka Hindu Rashtra ki dei ki ba iakhleh sain hima bad ia kine ki 5 percent ki Hindu la pyndonkam kum ki atiar sain hima na ka bynta ban ioh khring vote. Hynrei, kane kan shu iai long tang ka jingphohsniew.”
Kham hashwa u Ajmal u la kyrpad ia ki paid Muslim ha Assam ba kim dei ban pyniap masi ha kane ka lehniam Eid ka ban wan, bad u la kyntu ruh ia ki ban leh ia kane ka jingknia da ka ba pyndonkam da kiwei pat ki jait mrad khnang ban pyndep ia ka rukom jong ka jingleh niam.
Kane ka jingkyrpad watla katta ka la pynmih ia ka jingkhihwin hapoh Assam bad ka la pynkhie bitar ruh ia ki ba bun ki nongialam Muslim ha ka jylla ki ba la pynpaw pyrshah ia kane.
Halor kane, u Ajmal hynnin ka sngi Palei u la pynpaw lyngba ki lad pathai khubor da ka ba ong; “Nga la buh ka jingkyrpad na ka bynta ban burom ia ka jingsngew jong ki hymmen ki para ki ba dei ki Hindu. Wat ki ba bun na ki jaka hikai niam jong ki Muslim kim shym la kyrpad ia ka jingpyniap da ki masi.
Nalor kata u la ong ruh ba wat ka Darul Uloom Deoband ka ba dei ka jaka pule ba heh tam jong ka niam Islam ruh ka la pynmih ia ka ba kum kane ka juh ka jingkyrpad ha kine ki khyndiat snem ba la dep.
