Shillong, Jylliew 14 : U Myntri Sorkar ka Assam Pijush Hazarika hynne ka sngi Balang ula kam ba dei ki kynhun runar kiba pynthut ia ki paid Khasi-Pnar ha khappud ka Ri-lum Jaintia bad Karbi-Anglong bad kine ki runar kim dei satia kiba na Jylla Assam.
“Ki kynhun runar kim dei satia ki jong ngi” ong u Hazarika haba iakren bad ki nongthoh khubor hadien ka jingpyniaid ia ka jingialang iakren pynbeit pud bad u Symbud Myntri Rangbah ka Jylla Bah Sniawbhalang Dhar ha Shillong.
U Hazarika u dei uba khlieh ia ka Regional Committee ka West Karbi Anglong District katba u Bah Sniawbhalang u dei uba khlieh ia ka Regional Committee ka West Jaintia Hills District, kiba shong bishar ia ki jaka iakajia ha Block-I bad Psiar-Khanduli.
Kane ka jingkynthoh kala mih halor ka jingiakulmar kaba mih dang shen hapdeng ki paid Karbi bad ki Khasi-Pnar ha Khanduli, West Jaintia Hills District.
Haba pynpaw ba ki briew na baroh artylli ki Jylla ha khappud ki don ia ka jingiadei ba iajan bha, u Hazarika ula ong “Ngi dei kiba ialong paralok bad ngim don eiei pyrshah ia ki briew na Meghalaya. Ngi don ka jingiadei ba iajan bha bad ka Meghalaya bad ngi burom bha ruh ia ki briew na Meghalaya bad kumjuh ruh jong kiwei ki Jylla ka thain Shatei Lam Mihngi ka Ri”.
Haba ban jur ia ka jingdonkam ban pynbeit noh iaka jingiakajia pud hapdeng ka Meghalaya bad Assam, une u Myntri ka Assam ula ong “Ngi don ia ka jingiakajia pud bala sahteng la slem bha hynrei nga thikna ban gin sa lah ban iapynbeit noh da ka jingiasngewthuh jingmut lang ha kine ki khyndiat por ban sa wan”.
Haba kylli, u Hazarika ula ong “Ki runar ki dei hi ki runar. Kumno phin pynithuh ia ki hynrei nga ong ha phi ba ki paid ka Assam ki ieid ia ki paid Meghalaya bad nga ngeit ruh ba ki paid Meghalaya ki don ia kajuh ka jingied ia ki paid ka Assam”.
Ha kajuh ka por, u Myntri ula pynpaw ruh ia ka jingsngewkhia halor ka jingiakynad ba dang shen ha Khanduli.
“Nga la bitar bha halor kane ka jingiakynad ki Karbi bad ki Pnar. Ngim dei ban don ka jingiakynad hynrei ngi dei ban don ka jingiadei ba iajan. Ka Sorkar jong ngi bad ki Myntri Rangbah ruh ki kwah ba kan don ka jingiadei ba iajan hapdeng ki nong Meghalaya bad ka Assam”.
Pule lang ia kane: Pynkynmaw ka FKJGP ia ka Sorkar ban pynkha C&RD Block ha Mawhati
