Shillong, Jylliew 13 : Ka Iingkashari Meghalaya High Court hynne ka sngi Ba-ar kala ong ba ka Highway ka dei ka lad pyniasoh kaba kongsan tam sha ki thain Shathie lam mihngi jong ka Ri bad ka dei ia kaban pynbha bad long iaid kali baroh shisnem.
Haba shong bishar ia ka PIL halor kane, ka Division Bench kala shimkhia halor ka kaiphod jinglong jingman bala ai da ka Sorkar kaba iadei bad ka Jowai By-Pass bad ka National Highway Authority of India (NHAI) ba iadei bad ka NH-6 hapdeng ka Jowai bad Rayacherra.
Ka Iingkashari kala shim khia ban tian bishar halor ki dur bala pynmih ha ki kot khubor ka Shillong ha kine ki khyndiat sngi kiba kdew ia ka jingjot jong ka surok Jowai Bypass wat hadien bala dep ban maramot da ka Tnad PWD (Roads) ka Jylla.
U Nongmudui ula wanrah lang ia ki dur ki dar ban pyni ba ka jingmaramot kam shym la neh satia wat tang arsngi.
Ka Iingkashari kaba bthah ia u AAG ka Jylla K Khan ba un iakynduh ia ki Heh Ophisar ka Tnad PWD (Roads) khnang ban lah pynbha noh ia kane ka surok hashuwa ka jingwan pura jong ka aiom lyiur.
Ka NHAI kala pyntip ba katto katne ki bynta jong ka surok hapdeng ka Jowai bad Khliehriat ka dei kaba donkam ban maramot. Wat ka surok ba palat ia ka Sonapur Tunnel ruh ka donkam ia kaban maramot.
Kat kum ka NHAI, ka dei pynkhreh mynta ban ai ia ka contract bad ia ka kam la khmih lynti ban pyndep noh hashuwa ban kut u bnai Naitung 2023.
Ka Iingkashari kala buh ban shong bishar biang ia kane ka kam ha ka 21 tarik u Jylliew.
Pule lang ia kane: Mynjur ka KHADC ia ka Rules ban pyntreikam noh ia ka Land Act
