Khliehriat, Naitung 7 : Ha ka jingiakhun pyrshah ia ka jingsaphriang u drok ha ka jylla, ki pulit jong ka East Jaintia Hills ki la ioh ban khang kdong ia kawei ka kali kaba kit ia kitei ki jingdih beain na Shillong bad thmu ban wan sha Shillong.
Na katei ka maruti zen kaba don ia u registration number WB-02-P-2867 la ioh bat ha Umtyra CP ryngkat bad arngut ki suba ba tip kyrteng kum u Heirtami Dkhar,(29) bad u Rajen Pale, (25) kiba hadien ba la khynra na ki la ioh ban kurup hynriew synduk ki jingdih beain ba la buhrieh bha ha ki jainphong jong ki.
La ong ruh ba hadien ba la thew lawoh la lap ba ka jingkhia jong kitei ki jingdih beain ba tip kum u heroin u la poi 72gram nangta sa kumba 17 sla pat u nitrazapan tablet, u dawai kuli ba la shah mana ban pyndonkam.
Ka jingioh ban kurup ia kitei kijingdih beain kadei da ka jingiatrei lang hapdeng ka ANTF bad ka Umtyra anti-infil CP ba ialamda u Additional SP Banraplang Jyrwa ryngkat u DSP Jason Myrom. Na ka daw ka jingther u lapbah ha Malidor kaba don sha liang Assam ka kynhun ka la hap ban bteng ia ka jingkhynra haduh kumba 15 kynta ei ei.
Ha kane ka jingjia la ioh ruh ban kurup haduh ar tylli ki mobile kynthup ki kali bad na ka liang ki bor pulit ki la rejistar case ia katei ka jingjia ha Khliehriat PS hapoh ka kyndon NDPS act.
Ka jingtohkit ka dang iai shakhmat ban lap dien shuh halor ka jingdonkti ban pyniaid iew ia kitei ki jingdih beain shapoh ka jylla.
