Tura, Naitung 07: Ha ka sien iakhun kaba radbah bha, ki pulit ka West Garo Hills ki la ioh ban kurup noh bun bha ki bike kiba lashah tuh na kylleng jong ka rilum Garo bad ioh ruh ban kem wat ia ki runar kiba ju donkti ha katei ka kam runar.
Ha ka jingkhynra kaba la pynkhreh bha hapoh ka jingialam jong u Superintendent of Police ka West Garo Hills District, u Vivekanand Singh Rathoreki la ioh ban kem haduh 17 ngut ki runar bad ioh pat ban kurup haduh 45 tylli ki bike kiba shah tuh na kylleng ki bynta jong ka rilum Garo kynthup naduh kiba na Assam ruh.
Kiba bun ki runar bad ruh ki bike kiba shah tuh ki dei na ki thain Rajabala, Jengjar bad Dadenggre. Nalorkata la ong ruh ba kitei ki nongtuh ki la buit tuh haduh katta katta da kaba leh thok ia ki kot kali bad pyndam wat ia ka engine number.
Kumta na ka liang ki pulit da ka thong ban khanglad ia ka jingshah tuh kaba khah khah bha ha rilum Garo, la thung da ka Special Investigation Team (SIT) hapoh ka jingpeit jong u Superintendent of Police, West Garo Hills haka 04tarik mynta u bnai. Ha katei ka SIT la aibor ruh ban tohkit ia baroh ki kali kiba la suba shah tuh ha kine ki san snem ba la dep.
“Lyngba ka jingtohkit kaba bniah kaba la pynlong ha kine ki saw sngi, ka SIT ka la ioh ban kurup hdauh 45 tylli ki motorcycle kiba la shah suba shah tuh bad ioh ruh ban kem haduh 17 ngut ki runar kiba suba donkti ha katei ka kam, ong u SP Vivekanand Singh Rathore.
La ong ruh ba na ki 17 tylli ki mobile phone bad ki tiar ba la ioh kurup na kitei ki runar, ki pulit ki la ioh ruh ban lap ba ka don ka jingiadei hapdeng ki runar na kawei ka jylla bad kaewi pat khamtam hapdeng ka Meghalaya bad Assam. Nalorkata, la ong ruh ba kito ki bike kiba thied na Assam la die ha Meghalaya bad kane ka iaid lang mar kylliang lyngba kito ki nongshna kali bad ki nongpyniaid iew ia ki kali second hand. Lyngba kine, haduh 10 tylli ki bike bym lap dien shuh la ioh ban kurup biang.
Ki jingtip kiba kham bniah halor kane
Na ki 45 tylli ba ioh kurup, 11 tylli ki dei na Rajabala, 12 tyli na Jengjal, 2 na Tura, 7 na Bongaigaon bad 13 tylli na Dadenggre. Kiba shah kem pat ha katei ka jingjia k ikynthup 15 ngut na Meghalaya bad 2 ngut na Assam.
Halor kane, na ka liang u SP u la ong, “La kyntu ba lada thied ne die ia ki kali donkam ban da iohshwa ia ka clearance na ki pulit khnang ban lait na kino kino ki jingeh hadien habud lym kumta u trai jong ka kali un kynduh jingeh lada jia ba ka kali ba u thied ka don bynta ha ki kam runar, aksiden bad kiwei kiwei.”
Shuh shuh u ong ruh ba na ka bynta kino kino kiba thmu ban thied ia ki kali second hand la kyntu ba ki dei ban ioh shwa ia ka Vehicle Enquiry Report na ki District Crime Records Bureau, Tura kaba don ha Tura Police Station building.
La iathuh ruh ba ka jingkhynra ia ka jingshah tuh ki bike bad ki kali ha ka thain ka dang iai bteng hadien ba ki la nang ioh shuh shuh ki jingtip bad kumta la khmih lynti ba ka jingioh kurup ruh kan nang bun.
