Guwahati, Jylliew 08 : Ka Kohima Bench jong ka Iingkashari Guwahati High Court kala khein iap ia ka hukum ka Sorkar Nagaland ba khang ia ka jingshalan, khaii bad die ia ka doh ksew ha iew ha hat bad ki restaurant.
Ka jingdie, khaii bad shalan ia ka doh ksew la khang naduh ka 4 tarik Naitung 2020 da ka Sorkar Nagaland lyngba ka hukum ba pynmih da u Chief Secretary hadien ka jingmih paidbah ka dur jong ki doh ksew bala pom lyngkhot lyngkhai ha ki byrni.
Ia kane ka hukum ka pynmih da u Justice Marli Vankung hadien ba shong bishar ia ka mukotduma bala mudui da ki lai ngut ki briew-Abei Zatsu, Neizevolie Kuotsu, bad Ketounyuu.
Ka Iingkashari kala ong “Ki nongmudui kila don ia ki permit ban shalan/khaii bala ai da ka Kohima Municipal Council, kaba shah ia ki ban shalan ksew sha Kohima bad ban kamai jakpoh da kaba die ia ki doh ksew la bun bun snem”.
Ha ka hukum ba dang shen, ka Iingkashari High Court kala ong baka Sorkar Jylla ne ki Ophisar kim lah ban mushlia ia ka hok jong kiwei satang lada ki lah ban kdew ia ka ain kiba ki lah ban iakhun pyrshah.
