Guwahati, Jylliew 8: Arngut ki nongsiat mrad kila mynsaw jur ha ka jingiather kuli bad ki Pulit ka Tnad Forest ha ka Manas National Park kaba don ha Musalpur Division, Assam ha ka sngi Balang.
Kine ki nongsiat mrad kiba mynsaw ki kyrteng u Dharmendra Vari bad Gopal Bahadur Magar, kiba dei ki nongshong shnong ka Baksa district.
Ki Heh ka tnad Forest ki iathuh ba hadien kane ka jingiather kuli, ki Pulit ka Tnad Forest kila kem noh ia kine ki arngut bad la pynkit ia ki sha Barpeta Medical College ba kin ioh ia ka jingsumar.
“Ha ka jingkhynra ia ka jaka, ngi la ioh ban kurup haduh 5 tylli ki suloi shna hi, katto katne ki kuli bad ka doh sniang khlaw na kine ki nongsiat mrad” ong ki Heh ka Tnad.
