Imphal, June 7: Ha ka jingjia ba sngew shyrkhei, uwei u Khynnah 7 snem, ka Kmie bad kawei ka Bahaiing kila shah thang im ha ki paidbhur, kiba la wiang ding ia ka Ambulance ba kit ia ki sha Hospital hadien ba une u Khynnah ula mynsaw na ka jingshei kuli ha ktem ki shipai Assam Rifles.
Kane ka jingjia kala jia ha ka tjain Iroisemba jongka Imphal West ha ka miet sngi U Blei. Une u Khynnah ba kyrteng u Tongding Hangsing, ula mynsaw na ka jingshei kuli ha ka jaka sah ba shipor ha ktem ki shipai Assam Rifles bad mar mar la pynkut ia u sha Hospital ban ai jingsumar.
Hynrei ha lynti, ki paidbhur kila pakhang lynti ia kane ka Ambulance ba kit ia une u Khynnah, ka Kmie bad ka bahaing bad kila wiang ding ia kane ka kali bad ia baroh ki briew ba don hapoh.
Ki Heh Pulit ki pyntip ba kaei kaba ki ioh tam na kane ka kali ka dei tang ki katto katne ki shyieng jong kine ki briew. Ha kane ka juh ka miet, la ujor ejahar ruh halor kane ka jingjia pyrshah ia ki briew kiba donkti.
Ka khubor ka iathuh ba u Tongsing bad ka Iing ka sem jong u, kila leit sah riehtngen ha ktem ki shipai Assam Rifle dang shisngi shuwa ba kin shah thang im.
Ki Heh Pulit ki pyntip ba ha ka sngi U Blei, kala don ka jingiather kuli hapdeng ki paid Kuki bad ki Meitei bad ha kane ka jingiather kuli, uwei u kuli ula leit shei ia u Tongsing na ki bynta ka khlieh bad uwei pat ula shei ia ka Kmie na ki bynta jong ka kti.
U Kpa jong u Tongsing u dei u Kuki katba ka Kmie ka dei ka Meitei. Kane ka Kmie ba iap ka kyrteng ka Meena Hangsing bad kawei ka bahaiing kaba dei ka Meitei ka kyrteng ka Lydia Lourembam.
Namar ka jingjur ka jingmynsaw, la pynkit noh ia ki mar mar sha Hospital hapdeng ka jingpahara jong ki Pulit bad ki shipai Assam Rifles hynrei kane ka kynhun kala shah khang lynti ha ka kynhun Meira Paibis (ka kynhun nongpeitngor jong ki kynthei Meitei).
Kane ka kynhun kala iakhun pyrshah ia ki bor pahara kiba mut ban pyniaid beit shakhmat ia ka Ambulance halor ka jingsa phriang khubor ba kane ka Ambulance ka dei kaba kit ia ki kaikhlaw Kuki ban leit buh sha kiwei pat ki jaka. Namar kane, ki paidbhur kila thom da ka bor bad kila wiang ding ia ka Ambulance ba kit ia kine ki shikmie shikhuun bad ka bahaiing ka Kmie.
