Imphal, Jylliew 05 : Ki bor shipai kila ioh ban kurup noh haduh 790 tylli ki tiar siat ba khlain bor bad haduh 10,648 tylli ki kuli kiba la tuh na ki Pulit ka Manipur ha ka jingkhie ka thma iapher jaidbynriew kaba sdang naduh ka 3 tarik u Jymmang.
Tang ha kine ki 24 kynta bala leit, kila don biang ki jingjia iaumsnam ba dang shu jia ha kylleng ki District ka Manipur hynrei ka Sorkar kam pat lah satia ban pynthikna bha.
Kat kum ka khubor, haduh 3 ngut ki briew kila shah thang im lane shah bomiap ha ki paidbhur ha Imphal West District. Kine ki briew ki dei kiba leit jingleit da ki artylli ki kali ha ka por ba ki shah thombor ha Lamsang ha ka miet sngi U Blei.
Ha kajuh ka por, ki shipai bad Assam Rifles ha ryngkat ki Pulit Commando ka Manipur bad ka Central Armed Police Force (CAPF) kynthup ruh ki Border Security Force, Central Reserve Police Force bad Indo-Tibetan Border Police, kila pynlong ia ka jingkhynra kaba jur ban ioh kurup biang ia baroh ki tiar bala tuh na ki Pulit bad ban kem ia ki ehrang kaikhlaw.
“Ia ki jingkhynra la pynlong ha ryngkat ka jingiarap ban syntiat jong ki drone bad ki quad-copter. Ka jingkhynra haduh mynta kala lam sha ka jingioh kurup ia bun bah ki tiar ialeh kynthup ki mortar, ki kali bad kiwei kiwei ki tiar” ong u nongaiktien ki shipai.
U iathuh ba ia mynta, haduh 37,450 ngut ki briew na ki jaidbynriew bapher bapher kila shong riehtngen ha ki 272 tylli ki jaka sah ba shipor bala pynkhreh da ki shipai bad ka Sorkar ha ki 13 tylli ki District ka Jylla.
