Shillong, Jylliew 05: Ka Estimate Committee jong ka Meghalaya Legislative Assembly, kila leit jngoh ia kawei ka skul Sorkar ha New Delhi bad ruh ia ka Mohalla Clinic jong ka Sorkar Delhi ban iohi dala ki jong ki khmat ia ka rukom pyniaid ia kine ki jaka ha kane ka Nongbah jong ka Ri.
Ki Dkhot jong kane ka Committee ki kynthhup ia u MLA ka Nongpoh uba dei u Chairman ka Committee Bah Mayralborn Syiem, bah Charles Marngar, u Remingtone G Momin, Limison Sangma, ka Mianmi D Shira kum ki dkhot.
Kine ki Dkhot ka Committee ki la leit jngoh ia kawei na ki skul sorkar kaba la tip ka Rajkiya Pratibha Vikas Vidyalaya kaba don ha Nai Basti, Kishan Ganj, New Delhi. Ka jingleit jngoh ia kane ka skul ka long ban sakhi da la ki jong ki khmat ia ka rukom pyniaid ia ki skul sorkar ha nongbah Delhi.
Ha kane ka jingleit jurip, ka komiti ka la lap ba ki skul sorkar ha Delhi ki long kiba la bit la biang bha namar ki don naduh ki Digital Classroom, ki CCTV, ki Laptop, ki Library, ki School Health Clinic haduh 20 tylli.
La sakhi ba haki School Clinic la don ruh kawei nongtrei ANM, Psychologist, MTW, bad uwei u Doctor, na bynta 5 tylli ki School Clinic.
Ha kajuh ka sngi, ka Estimate Committee jong ka Meghalaya Legislative Assembly ka la ioh ban leit jngoh ruh ia ka Mohalla Clinic jong ka Sorkar Delhi kaba la dep ban buh haduh 521 tylli ki Mohalla Clinic.
Kine ki Clinic pat ki dei na ka bynta ki paitbah nongshong shnong bad ki long ïing kiba duk, khlem siew dor eiei bad ha kine ki clinic ki ai ei ia ki dawai, ki blood test, ultra sound, ex-ray bad kiwei kiwei, bad na ka bynta ki jingshitom kiba kham eh, ki Doctor na kine ki Mohalla Clinic ki phah ia ki sha ki Hospital.
La sakhi ba ha kine ki Mohalla Clinic ki don ki Doctor, ki Nurse, bad ki Pharmacist.
