Shillong, Jylliew 05: Haduh mynta ka jingia pynbeit pud hapdeng ka jylla Meghalaya bad Assam, lah ban ong ba la pyndep haduh 60% bad hapoh une u snem yn lah ban pynbeit lut baroh 100%.
Ia kane la kam da u President ka Bharatiya Janata Party (BJP) Meghalaya bah Ernest Mawrie uba la ong ruh ba kane ka jingia pynbeit pud hapdeng Meghalaya bad Assam kala sdang hadien ka jingshim khia u Myntri Rangbah duh ka ri India u Narendra Modi hadien ba ula wanphai biang haka bor ha u snem 2019.
“Hadien ka jingshimti biang u Narendra Modi kum u Myntri Rangbah duh ka ri India ha u snem 2019 ula ban jur ba kala donkam ban pynbeit noh iaka jingiakjia pud hapdeng ki jylla hapoh ka thain Shathei Lam Mihngi (North East) bad naka liang u Myntri ka tnat kam pohïing ka sorkar pdeng u Amit Shah ula shim ka jingkitkhlieh ban iasyllok bad ki Myntri rangbah jylla ka Meghalaya bad Assam ban pyniaid shakhmat ia ka jingpynbeit pud” ong u bah Ernest.
U bah Ernest ula ong ba haduh mynta ki artylli ki sorkar jylla kila dep ban pynbeit iaki jingiakjia pud ha ki 6 tylli ki jaka na ki 12 tylli kiba don hapdeng ka jingiakajia, lyngba ka jingiasoi iaka Memorandum of Understanding (MoU) bad mynta ka kynti ka jingiakren bad pynbeit sa ia 6 tylli ki jaka iakajia kala iaid shakhmat.
U bah Ernest ula kynnoh ba ka jingslem ban pynbeit pud hapdeng ka Meghalaya bad Assam ka dei hi namar ka jingialeh Politiks ka Congress haka por ba ka synshar ha Delhi bad ha kine artylli ki jylla.
Ula ong ba hadien ka jingshimkhia ka sorkar pdeng ba ialam ka BJP, u Myntri Rangbah ka jylla Meghalaya Conrad K Sangma bad u Myntri Rangbah ka jylla Assam Himanta Bisawa Sarma, kila kloi ban shim ka jingkitkhlieh ban pynbeit noh iaka jingiakajia pud hapdeng baroh 2 tylli ki jylla.
“Hoid ki dang don katto katne ki jingiakajia hynrei naka liang ka BJP ka ai khublei iaki Myntri Rangbah jong kine artylli ki jylla kiba la shim khia ban sdang noh ka jingiakren pynbeit naka bynta ban wanrah ia ka shong suk shong shngain hapdeng ki paidbah jong baroh artylli ki jylla” ula ong.
