Shillong, Jymmang 30 : Ka Myntri Sorkar bad Chairman ka Committee ki seng sain Pyrthei Kong Ampareen Lyngdoh, kala khot ia baroh ki seng sain pyrthei kynthup ka Voice of the People Party (VPP), ba kin wan iashimbynta khlem pep sha ka jingialang jong ka Committee, ka ban iakren iathir halor ka Reservation Roster bad ka Reservation Policy ka Jylla.
Ka Committee kala pynbna ba kan shong jingialang lashai ka sngi ka 31 tarik Jymmang ha ka por 2:30 baje janmiet ha Secretariat ban iakren iathir halor ka Reservation Roster bad kumjuh ruh ia ki kam ba iadei bad ka Reservation Policy.
Kane ka jingkhot ka Myntri kala mih ruh tang da ki kynta hadien ba ka Sorkar Jylla kala thaw thymmai ia ka Committee ki seng sain pyrthei – kaba ka jingthmu jong ka, ka long ban iatai bad pyntreikam ia ka Reservation Roster lem bad ban iaphylliew jingmut halor ki kam kiba iadei bad ka jingtreikam ka Reservation Policy ka Jylla.
Kane ka rai ka Sorkar kala mih ruh tang shisngi hadien ba ka Committee bala thaw nyngkong-ka Committee on Reservation Roster bala khlieh da I Kong Ampareen, kala tyrwa sha ka Sorkar Jylla ban ailad ia ka Committee ba kan pyniar ia ka kti treikam jong ka Committee ba kan iakren ym tang ia ka Roster System hynrei ia ka Reservation Policy ruh kumjuh.
Lah ban kdew hangne ba ka Voice of the People Party (VPP), kaba don 4 ngut ki MLA, kala rai ban nym iadon bynta lang ha ka Committee ba thaw da ka Sorkar tad haduh ba ka Sorkar ka mynjur ban iakren ruh halor ka Reservation Policy.
Haba iakren bad ki Nongthoh khubor, ka Myntri ka pyntip baka Sorkar kala pdiang ia ka jingai jingmut jong ka Committee on Reservation Roster ban pyniar ia ki kyndon treikam ha kaban kynthup lang ia ka jingiakren halor ka State Job Reservation Policy.
“Ngi kyrmen ba baroh ki seng sain pyrthei (kynthup ka VPP) kin wan ban iashimbynta ha ka jingialang lashai ka sngi” ong ka Chairman haba bynrap “Ngi kyrpad jur ia baroh ki seng ba kin sngewbha ban wan iashimbynta”.
“Ngi kyrmen skhem ba lyngba kane ka jingalang, ngin sa nang lah ban pyniaid shakhmat ia ki jingiakren halor kine ki kam kiba iadei bad ka bha ka miat jong ki nongshongshnong ka Jylla” kala bynrap.
