Yn bei pisa ka ERD Foundation ia ki kam ialehkai jong u
Nongpoh, Jymmang 29: Uwei u Samla ialehkai Karate ula ioh ia ka jingithuh bad rung ha ka India Book of Record halor ka jingphah haduh 60 tylli ki shithi sha u Myntri Rangbah Duh ka Ri u Narendra Modi, kiba kdew ia shibun ki mat kiba ktah ia ka imlang sahlang.
Ki bor ka ERD Foundation Guwahati ka la ai ka jingiathuh ba kyrpad ia une u rangialehkai Karate u ba la tip kyrteng kum u Rajveer Singha.
U Chairman ka ERDF uba dei ruh u Chancellor ka University of Science and Technology, Meghalaya (USTM) u M. Hoque, u la pynpaw, ba na ka liang kane ka synjuk kan shimti noh ban bei pisa ia u ne u rangialehkai karate ha ka jingleit shah pyntbit ka jong u ha kane ka rynsan ialehkai bad ruh ban pynkup burom ia u shen.
U Rajveer Singha, u ba dei u nongshong shnong jong ka shnong Pandu, Guwahati, u la thoh haduh 60 tylli ki shithi sha u Prime Minister ka ri u Narendra Modi, kiba la kdew bad kren halor ki jingeh ba la mad hapoh ka imlang ka sahlang kiba kynthup naduh ka pule ka puthi, ka koit ka khiah, ka jingbym shngain jong ki khyllung khynnah kynthei, ki longkmie bad ruh halor ka jingnang kynrei jong ka bamsap bad kiwei kiwei ha kaba u la rai ruh ban nang bteng ban iai thoh ia ki shithi sha u Myntri Rangbah Duh ka Ri India.
Halor kane ka jingiai pyrshang jong u ne u rangialehkai karate, ka kynhun India Book of Records ka la ai ka jingithuh kyrpang ia kane ka jingpyrshang jong u bad ruh ka la ithuh ia kane kam jong u Rajveer da kaba phah ia u da kawei ka syrnot kum ka jingithuh kyrpang ia ki kam ba ula leh.
U Chancellor ka USTIM, u la pynpaw ia ka jingkmen ban tip halor kane ka jingpyrshang ka jong u samla Rajveer Singha da kaba kdew ruh ba ka dei kawei na ki jingkitkhlieh ne ka kamram kum u khun samla jong ka ri ban pynsngew ia ka jingsngew bad ka jingiohi ka jong u halor ka imlang ka sahlang bad ka jingdonkam ia ka jingkylla.
Ula ong ba kane ka dei ka nuksa ia kiwei kiwei ki khun samla jong ka ri hi baroh kawei.
