“Ngi jied ia phi ban long u Khla ym u Shrieh” ong ki paidbah hakhmat Iing u Bah Paul Lyngdoh
Shillong, Jymmang 26 : Katto katne ngut ki riew paidbah kila iatur hynne ka sngi Thohdieng sha ka Iingsah u Working President ka UDP bad Myntri Sorkar Bah Paul Lyngdoh ha Mawprem, bad kynthoh tyngeh da ki jingthoh halor ka jingsngap jar iaka jingktah ka State Reservation Policy ia ka jaidbynriew Khasi-Pnar.
Kane ka kynhun kaba don kumba 20 ngut eiei, kila iarah lang bad la ki jong ki placard kiba don ia ki jingthoh “Ngi jied ia phi ban long u Khla ym u Shrieh”, “Ka lawei bad ka shuki rai ma phi mynta, ia ka lawei jong phi ngin sa rai ma ngi”, “Ka Jaidbynriew ne ki Sbai”, “Jingshet Kylla”.
Kila pynkymaw ruh ia ki jinglong Nongialam u Bah Paul Lyngdoh ha ki snem bala leit noh da ka jingthoh ha ki banner “Phi dei u Nongialam ka PRAC, Mynta phi dung kylla ia ngi bad pruk bad prak”.
Nalor kane kila kynthoh ruh da ka jingthoh ha ki banner “Phin roi ma phi, ngim don jingbishni,hynrei ym da ka lawei ka hok jong ngi”.
Kila pynpaw ruh ia ka hok ban dawa bishar thymmai ia ka Reservation Policy da ka jingthoh “Ngi bun paid, Ngi bun Nongmihkhmat, bun ruh ki samla khlem kam, hato phi dang sngap jar”.
Kane ka jingiatur ki riew paidbah sha ka Iingsah ki MLA kala jia ruh ha kylleng ki jaka jong ka Ri-lum Khasi Jaintia kynthup ha Pynursla ka constituency u Symbud Myntri Rangbah ka Jylla, Mylliem ba mihkhmat da u MLA ka Congress, Nongstoin, Amlarem, Mawsynram bad kiwei kiwei de.
Kane ka jingiatur ki paidbah sha Iingsah ki MLA kala mih hadien ka jingmih shah jingit u President ka VPP bad MLA ka Nongkrem Bah Ardent M Basaiawmoit namar ka jingsngap jar ka Sorkar ia ka jingdawa ban khot pynlong ia ka Dorbar Kyrpang ka Iingdorbar Thaw Ain ban iakren bad iabishar thymmai ia ka State Reservation Policy.
Pule lang ia kane: Kyntait u Bah Ardent ia ka jingkhot iakren ka Sorkar, kwah ban khot da ka Dorbar Kyrpang
