Shillong, Jymmang 25 : U bah Process T. Sawkmie, MLA barim u la kyntu ia ka tnad PWD ba kan pyntreikam noh ia ki skhim jong ki lai tylli ki shnong, kiba kynthup ia ka Mawlai Umjaiur, Nongpdeng bad Nonglum kaba u la pynioh ha ka por long MLA ma u.
U MLA barim u khlem shongthait satia ban iai buddien ia kine ki skhim bala dep mang naduh ka por ba u long MLA bad kyntu ia ka Tnad ba kan pyntrei noh shaid shaid ia ki haba buh hakhmat ia ka jingmyntoi kaba kin ai ia ki paid Nongshongshnong.
“Ka long kaei kaei kaba sngewsih ba haduh mynta, ka tnad PWD kam pat sdang satia ia ka kam hynrei ha ka jingbuddien jong nga bad ha ka jingiakren bad ki ophisar ka tnad PWD Department, la sngewthuh ba kine ki skhim baroh la hap ba pynthymmai ne revise ia ka mang tyngka (estimate),” ong u bah Sawkmie haba kren sha u nongthoh khubor.
U la bynrap, “Namar ka skhim ka la kham slem, bad ka dor ka mur baroh ka la kiew, kumta kine ki lai tylli ki skhim kin kham shimpor katba ka Planning bad Finance Department kim pat ai ia ka jingmynjur (approval), ban revise ia kine ki skhim,”
U la pynpaw ruh ba na ka liang jong u, un iai bteng ban buddien ia kine ki skhim haduh ban pynurlong namar ki paidbah nongshong shnong jong ka shnong Nongpdeng block A bad block B ki paidbah ki la shitom shaba palat bad kumjuh ruh ka surok Mawlai Umjaiur ha ka dong umshing, kaba ki paidbah ki la khmih lynti bha namar ka jingeh ka leit ka wan.
U la ong, kaba sngewtynnat pat ka long ba ka Tnad PWD ka la dep ai ia ka work order ia kine ki jingtrei baroh.
Ha kaba ia dei pat bad ka jingtap slep ia ka nala hapoh Mawlai Phudmuri, hajan madan heh stadium, kane ka jingtrei katkum ka jingiathuh ka tnad PWD, ki kontraktor ki la sdang ia ka jingtrei bad u kyntu ia ki kontraktor baroh, ba ioh ia kane ka kam ba kin sngewbha ban trei kham sted khnang ba kan pynsuk ia jingdonkam ka shnong ka thaw.
