Shillong, May 25: Ka Rangdajied United kala nang jam shajan ban ioh rung sha ka Semi Final jong ka Meghalaya State League 2023 da kaba pynrem da 3-0 ia ka Rymbai Iawpynsing ha ka Group B kaba la long hynne ka sngi Palei ha Kiang Nangbah Stadium, Jowai.
U Oresterwell Langshiang ula thep iaka kol kaba sted tam ha ka MSL kata ha ka 15 sekhon mar ia sdang ka jingiakhun bad hadien kane u Aibiangmame Nongneng ula ioh thep ia ka kol ha ka minit kaba 70 bad u Wansiewdor Nengnong ula thep ka minit kaba 81.
Lah ban ong, kala don ka jingiakhaid ha ka jingkamai Point hapdeng ka Rangdajied bad ka Ladthalaboh, hynrei da ka jingioh thep haduh 3 kol ka Rangdajied kala ioh ban long ka lahduh da ka Goal Difference ne ka jingiapher haka jingthep kol.
Ha kane ka jingiakhun ka Rymbai wat kala shah thep shi kol mar ia sdang hynrei kala iakhun tyngeh ban ym ailad iaka Rangdajied ban ioh thep kol biang bad kane ka kynhun kala khanglad ia ki rangialehkai ka Rangdajied ban ioh thep kol, hynrei dei ha ka minit kaba 70 bad 81 ba ka Rangdajied kala ioh thep kol biang ban pynthikna syndon ba kan long ka lahduh jong ka Group B.
Ha ka jingiakhun kaba la long hynin ka sngi hapdeng ka Ladthalaboh pyrshah iaka Mulait United kaba la long ha Jowai, ka Ladthalaboh kala pynrem iaka Mulait da 3 la 0.
U Stephanson Pale ula thep ar kol ha ka minit kaba 40 lyngba ka penalty bad haka minit kaba 60 bad u Nickyboy Swer ula ioh thep ia kawei ka kol ha ka minit kaba 46.
Ka jingiakhun ha ka sngi Thohdieng kan long hapdeng ka Jyntru pyrshah iaka Umkseh ha ka Group A kaban long ha Shillong ha ka por 3 baje mynsngi, katba ha ka Group B ha Jowai, ka jingiakhun kan long hapdeng ka Youth Club Pdengkarong pyrshah ia ka Ladthadlaboh ha ka por 2:30 mynsngi.
Ha ka Group C ha Mawkyrwat yn iakhun ka Mawten pyrshah ia ka Seven United ha ka por 3 baje mynsngi bad ha ka Group D ha Tura, ka Warima Youth Club kan iakhun pyrshah iaka Atong Matgrik ha ka por 3 baje mynsngi.
