Shillong, May 19: Ka seng Congress hynne ka sngi kala pynpaw iaka jingsngewhun ia ka jingbatai bniah jong ka sorkar MDA ha kaba iadei bad ka jingthmu ban pyntreikam iaka Roster System ha ka jylla kumba la bthah da ka Meghalaya High Court.
U Nongialam ka Congress Legislature Party (CLP) Bah Ronnie V. Lyngdoh, ula ong ba ka seng kala sngewhun iaka jingpyni ka sorkar jylla iaki jingtip kiba bniah halor ka roster system.
“U Myntri Rangbah ka jylla u Conrad K. Sangma ula ai ka jingbatai kaba bniah halor ka Roster System bad ula pynthikna ruh ba kan ym donsatia kano kano ka jingnoh liang ia kano kano ka jaidbynriew” ong u Bah Lyngdoh.
Katba ki Nongialam ka TMC kila ai jingmut ba ka jingpyntreikam iaka Roster kadei ban long nangne shakhmat ym naduh ki snem kiba mynshwa.
U Nongialam ka TMC u Zenith Sangma ula pynpaw iaka jingsngewhun halor ka jingpynkhreh ka sorkar iaka Roster System bad kane kan long tang ha kaba iadei bad ka jingthungkam thungjam bad ym ha kaba iadei bad ka pule puthi.
