Shillong, Jymmang 16 : U Myntri Rangbah ka Jylla Conrad K Sangma hynne ka sngi Ba-ar, ula pyntip ba ka Sorkar Jylla kan sa khot ia ka jingialang jong ka Kynhun Myntri lashai ka sngi Balang ban iatai halor ka jingpyntreikam ia ka Roster System hapoh ka Jylla.
U pyntip ba hadien kane, ka Sorkar kan sa pynlong ia ka jingialang jong ka kynhun synrop Meghalaya Democratic Alliance (MDA) ka ban long ha ka 18 tarik Jymmang bad yn pynbud da ka jingialang jong baroh ki seng sain pyrthei (All Party Meeting) ha ka 19 tarik Jymmang.
“Ka Sorkar kala pynkhreh ia ki jingbatai kiba bniah bha halor ka Roster System bad shisien ba baroh kila iohi ia kane ka jingbatai, nga thikna ba ki jingartatien baroh kin sa jah noh” ong u Conrad haba iakren bad ki nongthoh khubor.
U Conrad ula pyntip ruh ba ka Sorkar Jylla kan sa khot ia ki kynhun Sengbhalang ban ai ia kane ka jingbatai ba bniah ha ka taiew ka ban wan. Kane ka kynhun kan kynthup ia ki Sengbhalang, ki Nongialam jong ki seng niam, ki Rangbah Shnong bad ki kynhun bapher bapher jong ka imlang sahlang.
“Ngi don jingmut ban iakren bad baroh halor kaei ka jingmut jong ka Roster. Ka jingeh hi ka long ba bun ki briew kim pat sngewthuh kaei ka Roster ne ka mut aiu. Ka dei kaba jyrwit jyrwat bha, hynrei kaba suk pat ban sngewthuh. Ka long kaba eh hynrei nga thikna ba shisien ba kila ioh ia ka jingbatai, kin sa hun” ong u Conrad.
