Shillong, Jymmang 16 : Namar ka khubor ba ki ehrang ka kynhun Garo National Liberation Army (GNLA) kila pyrshang ban pynkhie im pat ia ka kynhun, u Myntri Rangbah ka Jylla Conrad K Sangma hynne ka sngi Ba-ar ula ong ba un sa lum ia ka jingialang ban shong bishar ba haduh katno kane ka khubor ka long kaba shisha bad kaba lait.
Lah ban kdew hangne ba ka internal memo jong u Heh Pulit DySP ka West Garo Hills kala lait pyllait bad paw ha ki kor social media ba ki ehrang ka GNLA kynthup ia kiba shah kem bad kiba pyndem wait, kila pyrshang ban pynkhie im biang ia ka GNLA haba pyntip ba haduh 500 ngut ki samla kila rung sha kane ka kynhun kiengatiar bad ia kine la phah sha Nagaland bad Burma ba kin ioh ia ki jinghikai pyntbit ha kaban pyndonkam ia ki tiar siat.
U Conrad ula pyntip ba ula ioh ia ka kaiphod napoh ka Sorkar hynrei u khlem pat ioh lad ban khmih bniah ia ka. Ula bynrap ba ka Sorkar kam shym la shim sting ia kane ka kam.
“Ngi da sngewkhia jur ia kane ka kam hynrei ngam mut ban ong ba ngi sngewkhia ha ka jingmut ba ngi khuslai hynrei phi dei ban sngewthuh ba kum ka Sorkar ngi la ioh ia shibun ki khubor bad haba ki wan, ngi hap ban pynshong nongrim bha ba haduh katno ka long kaba dei bad kaba lait” ong u Conrad.
Ula batai ba ki don ki khep ba ka Sorkar kala ioh pdiang haduh 100-200 tylli ki khubor ha kaba tang 2-3 tylli ki dei kiba don ka nongrim. Ka long kaba eh ban ong eiei ia mynta khlem da ioh khmih shuwa ia ka kaiphod hynrei kum ka Sorkar hi ngi khlem shim sting ia ka kam.
