Shillong, May 11: Ka Meghalaya State League (MSL) 2023, kaba la ap khmih lynti bha, kan sa sdang lashai ka sngi Thohdieng hapoh ka madan ialehkai Kiang Nangbah Stadium Jowai ha ka por 3 baje nohphai sngi bad ha kane ka lympung ialehkai football yn wan ban iashimbynta da ki kynhun kiba long ki lahduh ha kylleng ki District jong ka jylla.
Ha ka jingsdang jong ka MSL Season 3, ka jingiakhun kan long hapdeng ka Niaw Wasa United pyrshah iaka Rangdajied United bad ia kane ka jingiakob la pynlong da ka Meghalaya Football Association ryngkat ka jingkyrshan jongka tnad Sports and Youth Affairs naduh ba la sdang pynlong ia kane ka lympung iakob kum his bynta jong ka jingkular ka sorkar jylla ban kyntiew iaka jingialehkai Football ha ka jylla.
Ka Jowai Zone jongka MSL 2023 kadei kaba heh tam napdeng ki 4 tylli ki Zone kaba don haduh 7 tylli ki kynhun ryngkat bad kiwei pat kum ka Ladthadlaboh SC, Sein Pynbhalang SC, Youth Club Pdengkarong, Rymbai Iawpynsing SC bad Mulait United FC. Kane kan air uh iaka lad ia ki nongpeitkai ban sakhi iaki rangialehkai bad ia ki kynhun kiba tbit kiban aireng ha katei ka lympung.
Ia ki Tiket na ka bynta ka jingialehkai kaba lashai ka sngi thohdieng yn ioh hi na katei ka jaka bad kan don ruh ka Fan Zone ha kaba kan don ruh ka jingrwai na ka Jessie Lyngdoh, kaba la tahw iaka jingrwai jong ka MSL 2023 bad kiwei kiwei.
Nalor kane, kin don ruh ki jaka die bam kaba ki nongpeitkai ki lah ban leit bam ia ki jingbam bapher.
Ia katei ka lympung iakob ialehkai Football yn plie pyrda da u Myntri ka tnad Sports and Youth Affairs Bah Shakliar Warjri kum u Kongsan bad u MLA ka Jowai u Bah Wailadmiki Shylla kum u Kongsan Symbud.
Hynne ka sngi Palei, ki nongmihkhmat jong kitei ki ar tylli ki kynhun ialehkai football ryngkat bad u General Secretary ka West Jaintia District Sports Association Bah Lamat-o Laloo, uba long u Competition Committee Chairman jong ka MFA kila iakynduh ia ki lad pathai khubor ha kaba iadei bad katei ka jingiakhun kaban long ha ka sngi Thohdieng.
Kine ki ar tylli ki kynhun kila kyntu ia ki paidbah ban wan sha katei ka madan ban ai jingkyrshan lem ia ki nongialehkai khamtam haba ka Niaw Wasa kadei kaba na katei hi ka thain bad wat ki nongialehkai jong ka Rangdajied ruh ki don bha iaka jingiadei kaba iajan bha bad ka rilum Jaintia.
Ka Niaw Wasa kala jop iaka Super Division Football League jongka West Jaintia District Sports Association bad kala long ruh ka lahduh ha ka MSL ha u 2018, da kaba pynliem iaka Tynrongmawsaw ha ka jingiashut penalty ha ka Final kaba la long ha Jowai. Nalor kane, ka club kala jop ruh iaka Meghalaya State Futsal League kaba la pynlong nyngkongeh ha u 2021 bad kala shah jied ban iashimbynta haka National Futsal Club Championship.
Kane ka kynhun kala pynkhreh bha ialade ha ka jingiakhun iaka MSL kaba mynta ka kynti hadien ba kam shym la lah ban jam shakhmat ha ka MSL kaba la long ha u 2019.
Haba phai pat sha ka Rangdajied United, kala long ka kynhun kaba la wan baar ha ka MSL 2019, ha kaba kala shah pynliem haka Shillong Lajong ha ka penalty ha ka jingiakhun kaba la long ha Khliehriat. Ha ka aiom kaba la dep ka RUFC kala wan baar haka Shillong Premier League bad mynta kala pynkhreh bha ha ka jingiakhun iaka MSL bad ban pyrshang ban iohrah ia ka nam lahduh.
Hadien jong ka jingplie pyrda iaka MSL ha Jowai, ki 3 tylli ki Zone, kata ka Tura (Chandmari Ground), Mawkyrwat (MDSA Ground) bad Shillong (Third Ground, Polo) kin sdang ia ka jingpynlong ia katei ka lympung iakob ha ka sngi Saitjain.
