Shillong Jymmang 11: Ka Department of Telecom (DoT) kala lap ba ki don kumba 1.52 lak ki Connection Mobile Phone kiba la shu ai da ki kot kiba thok ha kiba bun ki Points of Sale (PoS) jong ki Telecom Service Providers (TSP) bapher bapher ha ki hynriew tylli ki jylla kiba hap ha ka North East LSA kiba kynthup ia ka Arunachal Pradesh, Manipur, Meghalaya, Mizoram, Nagaland bad Tripura.
Ka Ministry of Communication jong ka sorkar pdeng kala pyntip ba palat 1.47 lak tylli ki connection mobile kim shym la lah ban pyndep ia ka kam ban pynthikna biang (re-verification) bad la pynduh noh ia kine da ki TSP ha ka thaiñ bad haduh mynta, ki TSP ki la kyntait ia 493 tylli ki PoS bad kila ai haduh 71 tylli ki jingujor sha ki pulit pyrshah ia kine ki PoS khnang ba ki pulit kin leh ia kaba donkam.
Ka sorkar pdeng kala pynpaw ba bun na ki kam be-aiñ kum ki cybercrime, ki jingthok pisa bad ki kam sniew ha ka imlang sahlang kidei kiba la leh da kaba pyndonkam ia ki SIM kiba ioh, da kaba shu ai iaki kot ki sla kiba thok.
Khnang ban lap bad weng ia kum kine ki SIM, ka DoT kala shim ia ka sienjam ban thaw bad pyntreikam ia ka Artificial Intelligence and Facial Recognition Powered Solution kaba la shna da ka ri na ka bynta ka Telecom SIM Subscriber Verification (ASTR) – kane kadei ka rynsan kaba thmu ban pynlait na ki kam be-aiñ cybercrime.
Kane ka rynsan kan pyndonkam ia ki dur jong ki nongbat mobile bad ka database jong ki Telecom Subscriber Provider (TSP) ban lap ia ki jingshim connection mobile da kaba ai ia ki kot ki sla ba thok.
