Shillong, Jymmang 11 : U MLA ka BJP bad Myntri Sorkar Bah Alexander Laloo Hek ula kyntait ba ula iakren bad u Nongialam ka AITC Dr Mukul Sangma, ban pynduh ia ka kynhun Meghalaya Democratic Alliance (MDA) ba ialam da ka NPP ba kan ioh thaw Sorkar biang ha Jylla.
Haba kyntait ba iakynduh bad une u Nongialam ka AITC, u Bah Hek ula ong “Nga kyndit ban ioh pule ha ka kot khubor hynne ka sngi, hadien ba thaw ia ka Sorkar MDA-II, ngam shym la iakynduh ia u Dr Mukul Sangma ne u Dr Mukul un wan iakynduh ia nga”.
Une u Myntri Sorkar ula ong ba ma u bad u Dr Mukul kila shu iakren kai katba dang iadih sha halor ka jingiabynrap lang noh jong ka AITC bad ka BJP.
“Dei ha ka por dih sha ha ka Dorbar ka Iingdorbar Thaw Ain ka Jylla, ha ka kamra u Lamphang, ngi la iakren kai ia kane. Ula kyntu ia nga ban wan iasoh noh sha ka AITC bad nga ong balei ba um rung sha ka BJP”. Kane ka dei ka jingiakren hapdeng jong ngi,ong u Bah Hek.
“Kam shym la don satia ka jingiakren ban pynkhyllem ia ka Sorkar ne iakren eiei pyrshah ia ka Sorkar MDA. Ngi la shu iakren kai ia kane kata ruh ha ka kamra treikam jong u Lamphang ha Iingdorbar Thaw Ain” pynshai u Bah Hek.
Haba pynpaw ia ka jingsngewhun halor ka bhah kam, u Bah Hek ula ong ba ka Sorkar MDA-II ka dang iaid dang arbnai bad shibun ki kam ba bha kila jia hapoh ka Jylla Meghalaya.
“Ka BJP kan nym iatreilang satia da lei lei ruh bad ka TMC lane ka Congress” ong u Bah Hek haba pynpaw ba um don daw eiei ban nym iatreilang bad ka NPP.
“Tang lada baroh kaweika TMC lane ka Congress ki wan bynrap noh sha ka BJP, kane kala iaid da kumwei pat” ong u Bah Heh haba bynrap ba ka jingkhang jong ka BJP kan iai plie ia baroh ban wan rung.
Kane ka jingkren u Bah Hek kala mih tang shisien hadien ba u Dr Mukul ula phla ba u Bah Hek ula suhbuit ban pynkhyllem ia ka Sorkar MDA-II.
