Shillong, Jymmang 10: U Lat ka jylla u Phagu Chauhan hynne ka sngi ula leit ban jurip iaka thain Dawki West Jaintia Hills kynthup iaka Dawki Land Port ba dang shu plie dang shan, kaba pyniaid da ka Land Port Authority of India (LPAI) lem bad iaka Integrated Check Post (ICP).
Ha kane ka sngi u Lat ka jylla ula iakynduh ruh iaki ophisar ka Land Port Authority of India (LPAI), ki heh shipai BSF, ki ophisar ka tnat Customs, ki bor district naduh u Superintendent of Police, PD-DRDA, SDO (Civil) jong ka Amlarem bad Pynursla Civil Sub Divisions bad iaki rangbah shnog ka thain.
Ha kane ka sngi u Lat ka jylla ula ioh sngew halor ka jingtreikam ka Integrated Check Post ha Dawki, ka jingtreikam ka tnat Customs bad Central Excise Department bad kumno la pyntreikam iaki skhim sorkar pdeng kum ka PMAY, MGNRERS, SSA, PM-POSHAN, National Health Mission, PMGSY daki tnat sorkar jylla.
Naka liang u Superintendent of Police (SP) West Jaintia Hills ula iathuh sha u Lat halor ka jinglong jingman hapoh ka district bad ka thain baroh kawei bad ula iakren ruh bad ki rangbah shnong jong kane ka thain ban ioh sngew halor ki rukom pyntreikam iaki skhim hapoh ki shnong.
Naka liang ki rangbah shnong kila pynpaw sha u Lat ka jylla halor ka jingtlot ki Mobile Network hapoh ka thain bad haka juh ka por kila pynsngew ka jingsngew khia halor ka jingsuki ka rukom pyntrei iaka surok Shillong-Dawki.
Nalor kane u Lat ka jylla ula leit jurip ruh iaka Indo- Bangladesh Maitri Dwar kaba don ha Tamabil Border Check Post bad ula iakren bad ki ophisar ka tnat Bangladesh Border Guards. Ula sam iaki jait jingbam kum shi bynta ban wanrah shuh shuh ka jingiajan hapdeng kine artylli ki ri.
U Lat ula leit ruh ban jurip iaka Border Out Post (BOP) jong ka 4th Battalion Border Security Force (BSF) ha Dawki bad naka liang u Pradeep Kumar, IPS, Inspector General of BSF HQ Shillong Frontier ula iathuh halor ka jingtreikam ki shipai BSF ban pynkhlain iaki lad jingiada ha ki thain khappud.
Ha kane ka sngi u Lat ula leit shangkai pyngad ruh shaka wah Umngot River haka jingdon lang u Commissioner bad Secretary u Dr. B. D. R. Tiwari lem bad kiwei kiwei de.
