Shillong, Jymmang 10: Ka Khasi Hills Autonomous District Council (KHADC) hynne ka sngi Balang kala shim ia ka rai ban pynduh noh ia ka jingot kilo ia kino kino ki marrep kiba pynrung hapoh ka Iewduh, Shillong.
Ia katei ka rai la shim da ka KHADC hapoh ka jingialam u Chief Executive Member (CEM) bah Titosstar Well Chyne ha ka jingialang kaba la wan ban iashimbynta lang da ki nongkhaii, ki nongialam ka Hills Farmers Union bad na ka Hima Mylliem.
“Ka jingialang, kala shim ia kawei ka rai bad kata ka long ba naduh mynta ym dei ban don shuh kano kano ka jingot kilo ia ki marrep ba wan pynpoi ha Iewduh bad dei ban bud ryntih ia ka hukum ba la pynmih da ka Hima Mylliem ha u 2019” ong u Bah Titos.
Ula ong ba kat kum kane ka hukum la kdew ‘Ka Dorbar u Acting Syiem ka Hima Mylliem ka la rai ban iai pynbna kumba ju leh man u snem ban pynkynmaw ba ia ki marrep ba wanrah da ki nongrep ban die ha Iewduh ne ha kino kino ki iew ba hap ha Hima Mylliem, ki nongthied kidei ban da thew biang ia ki Khoh ki Byrni bad ki Kriah ba la pynthylli hadien ba la pyllait ne theh ia u marrep khnang ban tip katno ka khoh ka byrni ka khriah ka khia bad sa khate.”
U CEM ula ong, ka Council kala rai ba ym dei shuh ban don ka jingot kilo ia ki marrep bad dei ban bud ryntih ia ka hukum ba la pynmih da ka Hima Mylliem ha u snem 2019.
“Ka kyntien ot kilo kam dei ban mih shuh, hynrei dei ban shim ba la kyntait ia u marrep ba pyut. Hynrei lada don ki nongrep ba dang pdiang ia ka jingot kilo kata kan shong ha ki, hynrei na ka liang ka Council kan nym don shuh ka jingkitkhlieh ia kito kiba pdiang” ong u CEM.
Ula iathuh baka Council kan pynmih ruh ia ka Notification kaba long kum kajuh ka hukum jong ka Hima Mylliem bad kane kan treikam ia baroh ki ïew kiba don hapoh u pud u sam jong ka District Council khnang ba kan nym don shuh ka jingot kilo ia ki marrep ha kino kino ki ïew.
Nalor kane la shim ruh ia ka rai ban buh ia ka Special Committee kaban khlieh da u CEM ryngkat ki Executive Member, ka HFU, ki nongkhaii bad ki khlieh Nongsynshar kynthup ki Syiem bad ki Sardar ban iakren iaka jingeh jongki Nongrep ha kylleng ki District.
U Bah TW Chyne ula pyntip ruh, ba ka Council kala shim ruh ia ka rai ban wanrah ia ka 2nd Amendment Bill kaba dei iaka Khasi Hills Autonomous District Establishment Management and Control of Market ha kaban yn thep ia ki kyndon ban mana tyngeh haba iadei bad ka jingot kilo.
