Nongstoin, Jymmang 08 : Ki hynriew tylli ki Shnong ka thain Rambrai, West Khasi Hills District, kila rai ban ieng pyrshah halor ka jing thmu tih marpoh khyndew jong kawei ka kompani ha ka Shnong Mawlangria.
Kane ka rai jong ki hynriew shnong kala mih na ka jingialang jong ki Sordar kaba long hynne ka sngi ha ka shnong Mawthaw, ha ka jingiadon ryngkat ka KSU bad FKJGP-Rambrai Circle.
Kine ki Shnong ki dei ka Mawthaw, Mawmluh II, Urkhli, Mawliehpoh, Umsiej, Lawdibah.
Kane ka jingpyrshah kala mih namar ka jingwan ksam marpoh khyndew jong kawei ka kompani bym tip kyrteng, ha kane ka shnong, kaba la pynjaboh bad pynjngut ia ka tyllong umbam umdih jong kine ki shnong.
U Sordar ka Mawghaw Bah S Myrthong ula pynpaw ba lada ki shnong ki thaw ki dang ailad ia kane ka kompani ban bteng ia ka jingksam marpoh knyndew, khlem pep ki nongshongshnong ka thain kin nym lah pyndonkam shuh ia ka umbam umdih bala ring najan ka jaka ba ksam mar.
Ki Nongkren kila pyntip ba ka um ha kane ka tyllong umbam, kala kylla rong stem bad kala sop khlein kumba khleh petrol ne umphniang sharak.
Uwei u Nongshongshnong ka shnong Urkhli ula kynnoh ba naduh bas dang ksan marpoh khyndew ha kane ka jaka, ki khynnah khunling kila shu at ki ngap bad mih ki jynja ba at kum ki gland.
Nalor kane ka rai, ki Sordar jong kine ki 6 shnong kila rai ban leit ai dorkhas biang sha u Deputy Commissioner ka District ka ban long ha ka sien kaba lai, kaba dawa ban pynsangeh mardor ia ka jingksam marpoh khyndew ha kane ka jaka.
Kine ki hynriew shnong kila aipor tang 48 kynta ia ki bor District ban pynsangeh ia kane ka kam lem kumta kin shim daka sienjam kaba tyngeh.
