Shillong, Jymmang 08 : U Lamphang ka Iingdorbar Thaw Ain Thomas A Sangma, hynne ka sngi Nyngkong, ula aiti ia ka shithi bala ithuh ka Iingdorbar ia ka jingleit bynrap jong ki MLA ka PDF sha ka National People’s Party (NPP).
Kine ki MLA ka PDF ki dei u President ka party bad MLA ka Sohra Bah Gavin M Mylliem bad u Working President bad MLA ka Mawkynrew Bah Banteidor Lyngdoh.
Haba iakren bad ki nongthoh khubor, u President Bah Gavin M Mylliem ula ong ba kila wan sha Ophis u Lamphang ban lum ia ka shithi ai jingithuh da ka Iingdorbar ia ka jingleit bynrap ki MLA ka PDF sha ka NPP, kat kum ka shithi pyntip bala phah sha u Lamphang ha ka 5 tarik Jymmang.
Kine ki MLA ka NPP kila leit iasoh sha ka NPP ha ka sngi saitjain bala dep ha ka jingialang ba shongkun bha,kaba la pynlong ha headquarter ka NPP ha Shillong.
The MLAs of the People’s Democratic Front (PDF) formally joined the NPP on Saturday at an impressive function at the NPP headquarters in Shillong.
U National President ka NPP bad Myntri Rangbah ka Jylla Conrad K Sangma ula iadonlang ha kane ka sngi bad u dei ruh uba don bynta ha ka jingiasoi ia ki merger document bad u President ka PDF, kaba la leh ha ka jingiadon ryngkat ki Symbud Myntri Rangbah ka Jylla Bah Prestone Tynsong bad Bah Sniawbhalang Dhar nalor kiwei kiwei ki Nongialam ka NPP.
Haba kren ha ka jingialang, u Vice President ka NPP bad Symbud Myntri Rangbah Bah Prestone Tynsong ula ong ba kane ka jingwan iabynrap lang ka long kum ka “soskular kyntiew kurim”. Ula ong “Kum ka soskular kyntiew kurim, ngim dei ban iakhlad noh tang 2-3 bnai lane 1-2 snem hynrei “tang ka jingiap kaban pyniakhlad”.
U Conrad ula ong ba watla ki MLA ka PDG kila wan iabynraplang bad ka NPP tang ha ka sngi Saitjain, hynrei ka jingiakren ia kane ka kam ka dei kaba la pynlong la slem bha.
