Shillong, Jymmang 08 : U Myntri Rangbah ka Jylla Conrad K Sangma, ula ai ka jingkular ia ki Nongshongshnong ka Jylla ba ka jingiakren iasuk hapdeng ka HNLC bad ka Sorkar Jylla lem bad ka Sorkar Pdeng, kan sa iohi ia u soh ha kine ki sngi ban dang wan.
“Ka dei ka kam ba iai bteng bad kam dei kaba suk namar ki don shibun ki nongrim kiba ngi hap ban bishar bad ka jingia kren ka dang iai bad kala iaid ha ka lynti kaba dei” ong u Myntri Rangbah haba iakren bad ki nongthoh khubor hynne ka sngi Nyngkong.
Haba pynpaw ba ka jingiakren iasuk ka don ha ka lynti kaba dei, u Conrad ula ong “Ngi la iakren khlem sangeh bad ki (HNLC) bad shibun ki jingia aiktien kila jia ha kine ki khyndiat sngi bala leit”.
Namar ka jingiakren ka dei ka bym pat lah iathuh paidbah (confidential), u Conrad ula pynpaw ba um lah satia ban iathuh ia ki jingtip ba bniah ia mynta hynrei ula ong ba ka jingia aiktien markylliang kala nang iaid bad ka Sorkar Jylla ka khmih lynti ban nang iohi ia u soh ba bha ha kine ki khyndiat sngi ban wan.
Haba u snem bala lah, ka Sorkar Jylla kala ioh pdiang ia ka jingaiktien na ka HNLC ban pynlong noh ia ka jingiakren iasuk khlem da buh kyndon. Hynrei, kane ka kynhun kala wanrah mynta ia ki katto katne ki mat kiba donkam ban iatai pynbeit.
