Shillong, Jymmang 07 : Namar ba ka Manipur ka dang don hapdeng ka huri hura na ka daw ka jingkhie ka jingkynad jaidbynriew, ka Sorkar Meghalaya kala trei khlem shongthait ban wan ialam noh iala ki jong ki nongshongshnong sha ka jingshngain jong ka Jylla.
Hynne ka sngi U Blei, haduh 70 ngut ki Nongshongshnong ka Jylla la iarap ban pynmih noh na Manipur da ka Sorkar Jylla.
Na kine ki 70 ngut, 62 ngut ki dei ki samla pule. Ia kine ki nongshnong la wan ialam da ka liengsuin haduh ha Guwahati Airport na Imphal lyngba ka liengsuin Flybig. Na kine ki 62 ngut ki samla pule, 23 ngut ki dei kiban wan sha Shillong, 25 ngut sha Tura bad 14 ngut ki dei kiba la leit shaw hi da ki Kmie Kpa bad ki bahaiing hasem.
Ka Sorkar Meghalaya kala treikam khlem shongthait ban wan ialam noh iala ki nongshongshnong bad ban pynthikna ia ka jingshngain jong ki. Hynnin ka sngi saitjain, 17 ngut ki samla pule kila wan phai bad ha ka sngi thohdieng 66 ngut ki samla pule kila wan phai sha Jylla.
Pule lang ia kane: Dawa ka VPP ban tohkit ka NHRC ba siat iap ki BSF ia u Rangbah
Ka Sorkar Meghalaya kala pynkhreh ruh ia ki jingbam ia kine kiba wan phai na Manipur tang mar iapoi ha Guwhati Airport bad kumjuh ruh kala pynbiang ia ki kali ban kit ia ki sha Shillong bad Tura.
Ki samla pule kila pynpaw ia ka jingsngewnguh ia u Myntri Rangbah ka Jylla Conrad K Sangma bad ia ka Sorkar Jylla namar ka jingieng ha syndah jong ki bad ban pynthikna ia ka jingwan phai suk shala iing.
Ka kyrwoh na ka Ophis u Myntri Rangbah (Chief Minister Office) ka ong “U Myntri Rangbah ula bthah ia ki Heh Ophisar ban pynthikna ha kaban wan ialam noh ia ki samla pule kham kloi kat kaba lah…ngi da kmen ban iohi ia ka jingphuh samrkhie haba ki samla pule jong ngi kila iadon ryngkat bad la ki jong ki bahaiing hasem. Ka jingpynkhreh ka dang iaid shaid shaid ban wan ialam noh shala iing ia baroh ki samla pule ba dang don ha Manipur”.
Kane ka jingleit shaw ia ki briew na Manipur ka dei shibynta na ka jingkut jingmut jong ka Sorkar ban ai jingiada ia ka jingim jong ki Nongshongshnong lajong bad ban ai ha ki ia ka jingiada ha kane ka por ba jynjar. Ka Sorkar kala kular ia ki bahaiing hasem jong kito kiba shah ktah ba kan dang iai bteng ban leh ia kano kano ka kam ha ka bor jong ka ha kaban pynthikna ia ka jingshngain bad ka bha ka miat jong ki samla pule.
Pule lang ia kane: Manipur: Pynjynsur ka sorkar ia ka korphiw ha Churachandpur, nang pynkhlain ia jingiaid pahara ki shipai
