Williamnagar, Naitung 04: Ka District Session Court Williamnagar, East Garo Hills, kala pynmih iaka hukum ban set phatok 7 snem ia u nongleh be-ijot ia kawei ka longkmie kabala jia ha u snem 2017.
Ia kane ka hukum la pynmih haka 29 tarik u Jylliew da District Session Judge M Skhemlon bad la bthah ia u nongleh kam sniew ba u dei ruh ban siew T.1500 ryngkat bad ka jingshah set phatok sa shi snem ryngkat bad ka jingdaiñ kuna kaba T.500 lada pynkheiñ sa ia kiwei pat.
Ha ka 23 tarik u Rymphang 2017, la ujor iaka ejahar pyrshah ia u Md. Rafiqul Ali halor ka jingdonkti ban leh be-ijot ia kawei ka longkmie ha katei hi ka sngi bad ki pulit kila iohkem ia u Rafiqul bad la tohkit ia u lyngba ka Judicial Custody, katba iaka jingtohkit la tohkit da ka Nitu I Sangma, kaba dei ka Officer in Charge jongka Williamnagar Women Police Station.
Kane ka ophisar pulit ka la pyngngat ha ki kyndon kiba eh ia une u nongleh be-ijot bad la phah iaka Chargesheet hapoh 3 bnai sha ka iingkashari.
Ha ka 29 tarik u Jylliew 2022, hadien ka jinglap ia ki sakhi ki satar kiba paka pyrshah ia u nongleh kam sniew, u District Session Judge M Skhemlon ula pynmih iaka hukum pynshitom ryngkat bad ka jingdaiñ kuna.
