Shillong, Naitung 04: U Myntri Rangbah ka Jylla Conrad Kongkal Sangma ula pyni ia ka jingbym khein snep bad jingkhein dewthala ia ka jingshah kynthoh ba lai phew jait ha u Abhishek Banerjee, National General Secretary ka All India Trinamool Congress (AITC) ha ka jingwan iuhkjat nyngkong eh ha Nongbah Shillong dang shen.
“Shisha, ngam don jingsngew eiei ia kine ki jingkynthoh. Kum u Myntri Rangbah, nga la kut jingmut ban trei na ka bynta ki paid nongshongshnong ka Jylla” ong u Conrad haba jubab ia ki jingkylli ki Nongthoh Khubor halor ka jingsngew jong u ia ki jingkynnoh u Abhishek Banerjee ba ka NPP ka pyniaid ia ka Sorkar proxy (ba pyniaid harieh da ka BJP).
“Mano mano ruh ki long laitluid ha kane ka ri synshar paidbah ban kynthoh. Ki lah ban kynthoh kat kum ka jingsngew bit jong ki, Ngam sngew ba nga dei ban iakyrsum lang namar nga don shibun ki kam ba hap ban leh. Namar kata, ngam don eiei ban kynthoh” ula ong.
Haba kylli, u Myntri Rangbah ula jubab “Kumba nga ong, nga don shibun ki kam ba hap ban leh bad nga la trei iala ka jong ka kam da ka jingkut jingmut ban shakri bha ia ki paid nongshongshnong bad kane ka dei kaba kham kor ia nga”.
“Ngi pyniaid ia ka Jylla, Ngi don shubun ki kam ba hap ban leh bad ngam tharai ba ka don ka daw ia nga ba ngan kynthoh kylla ia kino kino ki jingkynthoh jong ki briew” ula ong.
