Shillong, Jymmang 06 : Ka People’s Democratic Front (PDF) kala buh haduh 11 tylli ki kyndon ha ka jingleit bynrap lang (merge) sha ka National People’s Pary (NPP) ba kynthup ia ka jingdawa pyntreikam ia ka Roster System nangne shakhmat (Prospectively) bad ka jingwanrah ia ka Inner Line Permit (ILP).
Kine ki 11 tylli ki kyndon ki dei kiba la pruid dak ha ka soskular iabynrap (merger document) bala iasou hapdeng u President ka PDF Bah Gavin M Mylliem bad u National President ka NPP Conrad K Sangma hynne ka sngi saitjain ha ka jingialang bala pynlong hapoh ka Ophis headquarter ka NPP ha Shillong.
Kiwei pat ki kyndon kiba la buh ha kane ka soskular ki kynthup ia ka jingpynbeit noh ia ka jingiakajia pud bad ka Assam, ka jingpynrung ia ka Ktien Khasi ha ka khyrnit ba phra, ka jingthaw ia ka Agriculture Policy, ka jingpyntreikam ia ka Employment Generation Policy, ka Transparent & Effective Recruitment Policy, ban shong bishar biang ia ka
Meghalaya Minor Minerals Concession Rules 2016, ban pynkhlain ia ka jingpynmih bording hapoh u 2028, pynjanai ia ka lad pyniasoh na suin sha Shillong bad tehlakam ia ka jingjyllei u droks hapoh ka Jylla.
Halor kane, u Myntri Rangbah ka Jylla ula kular ia ka PSF ban iatreilang ha kaban lah pynyrlong ia baroh ki kyndon bapher bapher bala pruid dak ha ka soskular iabynrap bad ong “Ngi don ia kajuh ka jingmut bad ai ba ngan kular ia phi ba ngin sa iatreilang ban pynthikna ban gin lah pynurlong ia baroh kine ki mat bala kdew ha ka soskular. Nga lah ban kular ia phi ba khlem pep ngin sa leh eiei ia kine ki kam”.
